ژ به‌ر دو ئه‌گه‌ران كوردان پشته‌ڤانیا كازمی كر
ئه‌ڤرۆنیۆز، سالار دۆسكی:
ئه‌ندامه‌كێ په‌رله‌مانێ عیراقێ ئاشكرا كر كو پشكا كوردان ل كابینا داهاتی یا عیراقێ دڤێت چار وه‌زاره‌ت بن، ده‌ستنیشانكرنا كه‌سایه‌تیا بۆ پوستێن وه‌زاره‌تان ب رازیبوونا كازمی و راوێژكرن ب ئالیێن سیاسی دێ بیت.
بشار كیكی، ئه‌ندامێ په‌رله‌مانێ عیراقێ ژ فراكسیوونا پارتی دیموكراتی كوردستانێ، ئه‌ڤرۆ چاره‌شه‌مبی 15ی نیسانێ بۆ ئه‌ڤرۆ نیۆز گۆت: (هاتنا كاودانا و تایبه‌ت ڤایرۆسێ كورونایێ و داكه‌فتنا بهایێ په‌ترۆلێ بوونه ئه‌گه‌ر ئالیێن سیاسی ئه‌وێن نێزیكی ئیرانێ بگه‌هنه وێ باوه‌رێ كو دێ تووشی زیانه‌كا مه‌زن بن و ئه‌ڤه ئه‌گه‌ر بوویه ئه‌ڤ كه‌ساتیه ببوو ڤی پوستی بهێته راسپاردن، ئه‌وا عادل عه‌بدومه‌هدی بۆ دكر، كازمی بۆ ناكه‌ت).
كیكی ئه‌و یەک ژی گۆت: (جوداهی یا كابینا نوو ژ كابینێن پێشتر هه‌ر تشتێ ئیرانێ بێژیت شتی وێ نابیت، ره‌نگه كازمی به‌لانسه‌كێ دناڤبه‌را هه‌موو ئالیان دا دروست بكه‌ت، ل سه‌ر بنیاتێ پاراستنا به‌رژوه‌ندیێن هه‌موو پێكهاتا ئه‌ڤ حوكمه‌ته دهێتـه ئاڤاكرن، تایبه‌ت ماف و ئمتیازاتێن د‌ستووری و ئه‌ڤه بۆ كوردان گه‌له‌ك یا گرنگه).
هه‌مان ئه‌ندامی ئه‌و ژی خۆیاكر كو كوردان پشته‌ڤانیا ڤی كه‌سایه‌تی كریه ل سه‌ر وی بنیاتی كو دێ پشته‌ڤانیا به‌رده‌وام هه‌بیت ل هه‌ر دو بیاڤێن وزێ و ئمناهیێ و له‌وما كورد رازی بووینه.
كیكی نه ڤه‌شارت ژی كو هه‌تا نوكه چ ده‌م بۆ كۆمبوونا په‌رله‌مانی ل سه‌ر دانا باوه‌ریێ بۆ حوكمه‌تا كازمی نه‌هاتینه دیاركرن، وه‌زیر ب رازیبوون سه‌رۆك وه‌زیران و ب راوێژكرن ل گه‌ل ئالیێن سیاسی دهێنه دانان و كوردان دڤێت چار وه‌زاره‌ت ڤێ كابینێ دا هه‌بن.