ژ بەر لاوازبوونا کەرتێ گەشتیاری ھندەک جھان شیانێن مەزاختنا موچێ کارمەندێن خوە نینە
ھەولێر، قائید میرۆ:
دەستەیا گەشت و گوزارا ھەرێما کوردستانێ گۆت پێشبینی دکەین ڤێ جەژنێ ژی ھژمارەکا کێم یا گەشتیاران بھێنە ھەرێمێ، دیار ژی کر کو قەیرانا دارایی و ھاتنا داعش و نەبوونا رێیێن ھشکاتی ل ناڤبەرا ھەرێمێ و پارێزگەھێن عیراقێ ئەگەرێن کێمبوونا رێژا گەشتیارانن.
پەیڤدارێ دەستەیا گەشت و گوزارا ھەرێما کوردستانێ نادر رۆستی بۆ ئەڤرۆ دیارکر ژ بەر ھاتنا داعش و قەیرانا ئابووری ڤێ جەژنێ ژی گەشتیار ناھێنە کوردستانێ و گۆت ئێک ژ بنەمایێن ھاتنا گەشتیاران بۆ ھەر وەلاتەکی گرێدایی رەوشا ئەمنی ڤەیە، پشتی شەڕێ تیرۆرستێن داعش، ئەڤی شەڕی ل جیھانێ دەنگ ڤەدایە و گەشتیار ناچنە وەلاتێن شەڕ تێدا، ئەگەرێن دیتر ژی زۆرن وەکو رەوشا ئابووری و نەبوونا رێیا گەشتیاران، چونکو پشتی گرتنا مووسڵ رێیا ھشکاتی د ناڤبەرا ھەرێمێ و عیراقێ نەمایە و گەشتیار نەشێن بھێنە ھەرێمێ، بەلێ ب رێیا فڕۆکەخانێن ھەرێمێ ھژمارەکا کێم ھەر دێ ھێن، ل ھەرێمێ ژی گەشتیارێن ناڤخۆ وەکو پێدڤی نابن، چونکو ھژمارەکا زۆرا ئاواران د جھێن گەشتیاری دا ھاتینە ئاکنجی کرن و گیرۆبوونا موچێ فەرمانبەران، کارەکێ وەسا کریە وەلاتی وەکو سالێن بۆری نەشێن گورەی حەزێن خوە سەرەدانا جھێن گەشتیاری بکەن.
نادر رۆستی گۆت ژی کەرتێ گەشتیاری ل ھەرێما کوردستانێ ل ھەیڤا تیرمەھا بۆری وەرە بەرەف لاوازیێ چوویە و کاریگەریەکا خراپ ل سەر ئابوورا ھەرێمێ ھەبوویە، چونکو ئەڤ ھژمارا زۆرا گەشتیاران دەمێ دھاتنە کوردستانێ رێژەیەکا زۆرا پارە ل جھێن گەشتیاری دمەزاختن پشتی کێمبوونا گەشتیاران جھێن گەشتیاری تووشی قەیرانێ بووینە و گورەی زانیاریێن مە وەکو دەستە ھژمارەکا زۆرا ئوتێل و موتێلان نەشێن کریا کارمەندێن خوە ژی بمەزێخن و ھندەک جھێن گەشتیاری و ئوتێل و مۆتێلان ھژمارا کارمەندێن خوە کێم کرینە.
