ژ بەر نەبوونا کەنیسان کریستیانێن دەشتا نەینەوا نەشێن مەراسیمێن ئایینی ئەنجام بدەن
ئەڤرۆ نیۆز، رەمەزان ھەرنی:
ژ بەر وان شەر و ئالۆزیێن ل دەشتا نەینەوا و دەڤەرێن کریستیانان دروستبووین پرانیا کەنیسە و جھێن ئایینی ژ لایێ چەکدارێن داعش ڤە ھاتینە خرابکرن و ژ بەر ھاتنا حەشدا شەعبی ھەتا نوکە نە ھاتینە نووژەنکرن .
سەفا چیچۆ چالاکڤانێ کریستیان ل دەشتا نەینەوا بۆ ئەڤرۆ نیوز دیار کر کو دەمێ شەر ل دەشتا نەینەوا دروستبووی تیرۆرستێن داعش دەست ب سەر پرانیا دەڤەرێن کریستیانان داگرت و خەلکێ وان دەڤەران ئاوارە بوو و ھەموو کەنیسە و جھێن ئایینی خرابکرن و وێرانکرن، لێ پشتی کونترۆلکرنا دەڤەرێن کریستیانا ژ لایێ ھێزێن پێشمەرگێ کوردستانێ ڤە ھژمارەکا مەزن یا کریستیانا ژ ئاوارەیێ زڤرینە سەر جھێن خوە، ھەر چەندە مال ژی ھاتبوونە خرابکرن، بەلێَ ئارامی ھەبوو ژ بەر ھێزێن پێشمەرگەی ل دەڤەرێ، لێ ھەتا نوکە کریستیانێن د بن کونترۆلا حەشدا شەعبی ڤە ڤەنەگەریاینە و ل ئاوارەیێ دژین.
ناڤھاتی ئاماژە دا وێ چەندێ کو ل گەل دروستبوونا شەری ل دەڤەرێ ھژمارەکا مەزن یا کەنیسان و جھێن ئایینی ژ لایێ تیرۆرستێن داعش ڤە ھاتنە خرابکرن، لێ ئەو جھێن کەفتینە د بن دەستھەلاتا پێشمەرگەی ڤە ھاتینە نووژەنکرن و گۆت: “ئەوێن دی ھەموو وەک خوە ماینە و چو مەراسیمێن ئایینی لێ نەھاتینە ئەنجامدان و کریستیان ژ مەراسیمێن ئایینی بێ بەھر بووینە”.
