ژ بەژالەیێن قەلەمێ من
د. ئەمجەد عوبەید
«وێنەیەک د بیردانکا تێلەفۆنا من دا»
د ناڤ قەرەبالغییا فێستیڤالا مەزن دا،
هزار دێم یێ دەریا مرۆڤان دبڕن.
ب هەلاتنا هەردو چاڤێن تە..
رۆژ بەر ب ئاڤابوونێ ڤە چوو.
داڤێن پرچا تە یا زەر
سەما ل گەل هوینکە بایێ ئێڤارێ دکر.
پشکوڕینەکا وەک کولیکێن گێلاسێ
ژ لێڤێن تە د وەریا.
سێڤێن سپیێن ل بن کراسێ تە یێ سۆر..
سێڤێن بەروارییان چیسکرن.
چ قەدەر بوو، دلێ من هەژاندی
دەمێ تە ل گەل گڕنژینەکێ..
سلاڤ ل من زڤڕاندی.
ئاخ بۆ وێ ئاوازێ دەمێ تو پەییڤی
هەمی مۆزیکژەن کەتنە نەشازی.
قەرەبالغ ڤەڕەڤی..
ژێ دەرکەتم دەست ڤالا
نە ژمارا تێلەفۆنەکێ..
نە ژڤانەک..
ژ بلی چاڤەرێبوونا قەدەرەکا دی..
ل فێستیڤالەکا دی..
و.. وێنەیەکێ تە..
د بیردانکا تێلەفۆنا من دا.
