ژ هه‌لبه‌ستێن یوسف الصائغ
هەلبەست: یوسف الصائغ
وه‌رگێڕان: حه‌سه‌نێ سلێڤانه‌یی
ته‌ڕم
ڤێ شه‌ڤێ دخه‌ونێ دا
ده‌نگێ هه‌ناسا وێ
ل سه‌ر روویێ من ده‌ربازبوو
ئه‌ز هشیاربووم
من دیت ته‌ڕم
ل سه‌ر ته‌ختێ من
نڤستی یه
ئه‌ز ڕابووم
من گلۆب هلكر
ته‌ڕمی هه‌ردو چاڤێن خوه ڤه‌كرن
ژ من پرسی:
ئه‌رێ شه‌ڤ ل ده‌ستپێكا خوه‌یه؟
من گۆتێ: به‌لێ.
گۆت: ما ناهێ دا بنڤین؟
په‌یكه‌رتاش
ئه‌ز ل نێزیكی خوه ده‌ینام و
كێر لێدا
دلێ وی و هنده‌ك ژ ته‌قنێ
بۆ من ده‌رئینا و
من گوهـ لێبوو یێ من هانددت
كو خوه ب ده‌ست ته‌قنێ و
لێڤا كێركێ ڤه به‌ردم
وێ گاڤێ من سه‌رێ خوه
بۆ چه‌ماند و
ل سه‌ر خوه گریم.
پشتی نه‌هێ
سه‌عه‌ت نه‌هێ لێدا
ل نیڤا شه‌ڤێ لێدا
دلێ من ژ ترسا لێدا
و دلێ ئه‌ڤیندارێ لێدا.
**
من گۆتێ:
خه‌ما نه‌خوه ئه‌ڤیندارێ
و نوكه هه‌ر ئێك
دێ خاچا خوه هلگرت.
نڤێژ 1
بابۆ،
هه‌ر تشتێ ته دڤێت
ل من قه‌ده‌غه بكه و
رۆهنییا هه‌ردو چاڤان و
ئاڤا هه‌ردو لێڤان
ژمن بستینه
لێ..
بابێ جامێر، من نه‌كوژه
هه‌لبه‌ستان ژ من نه‌ستینه.
نڤێژ 2
ئه‌ز ژ به‌زا ب شه‌ڤ و ڕۆژ
ل دویڤ ته وه‌ستیام
ژ خه‌ریبی و به‌نده‌مانێ وه‌ستیام
بێهێڤییێ بده من
هه‌كه بۆ ڕۆژه‌كێ ژی بت
دا ته‌نابم.
پێنج ژن
پێنج ژن رویس دبه‌زن
د پێشییا مه‌وكبی ڕا دكن
قیژییێن ب ترس ڕادهێلن
ل پێشییێ ژنا زێره‌ڤانی دهێت
د دویڤ ڕا ژنا خزمه‌تكارێ ده‌واران
پاشێ ژنا زه‌لامێ ته‌نگه‌زار و
خوه‌شتڤییا وی
و ئه‌و دبت یێ پێنجێ
هه‌می رێبوار رادوه‌ستن و
بێده‌نگی خوه د دنیایێ د ئالینت و
تڕومپێل دبۆرت.
تابیت
ده‌مێ مه تابیت ڤه‌كری
سه‌ره‌كێ بڕی و
قه‌میسه‌كێ هچك سۆتی و
دو ده‌ست و
سێ پێ
مه تێدا دیتن.
ئه‌گه‌ر… جاره‌ك دی
ئه‌گه‌ر تو ڤێگاڤێ هاتی
دو، دێ ل پێشوازیا ته‌بن:
یێ ئێكێ هشیاره و
یێ دی سه‌رخوه‌شه..
ئه‌رێ تو دێ هه‌ردو ده‌ستێن خوه
بۆ كێ ژ هه‌ردو زه‌لامان درێژكی و
تو دێ گازی كی: خوه‌شتڤی یێ من؟
ب كورتی
ئه‌ڤ شه‌ڤه
كابووس گه‌له‌ك كورت بوو:
مێزه‌ك و
شووشه‌یه‌كا شه‌رابێ و
سێ په‌رداغ و
سێ مرۆڤێن بێ سه‌ر
شیڤ
هه‌ر شه‌ڤ
ده‌مێ ڤه‌دگه‌ڕم مالا خوه
خه‌مگینییا من ژ ژۆرا من ده‌ردكه‌ڤت
ب قابووتێ خوه یێ زڤستانێ و
ل پشت من دچت…
دچم … دچت
دروونم …دروونت
دگریم،
بۆ گرییێ من دگریت
هه‌تا شه‌ڤ ب نیڤی دبت و
دوه‌ستین
هینگێ ئه‌ز خه‌مگینیا خوه دبینم
قه‌ستا لێلینگه‌هێ دكت
ده‌رگه‌هێ ته‌زینۆكێ ڤه‌دكت
ژ پارچه‌یه‌كا گوشتێ ڕه‌ش ده‌ردكه‌ڤت و
شیڤا من ئاماده دكت.
ئێڤارییا شه‌مبیێ
دڤێ سه‌عه‌تێ دا
ژ ئێڤارییا شه‌مبیێ
ژنه‌ك، ب ره‌خ منڤه نڤستی یه و
ژۆر د بێده‌نگی یێ دا خه‌ندقی یه
ئه‌ز پێشبینیێ دكم تشته‌ك رووبدت
بۆ نموونه:
پۆلیسه‌ك ده‌رگه‌هێ من ب قوتت
پرسیارا مرۆڤه‌كی نه‌نیاس بكت
ئان ئه‌ز به‌رێخوه بدم
بن ته‌ختێ خوه و
مرۆڤه‌كێ كوشتی ب بینم.
ژ نشكه‌كێڤه
ئه‌ز خوه درێژكری بووم
ل سه‌رته‌ختێ خوه و
ب ره‌خ منڤه ژنه‌كا رویس
ژ نشكه‌كێڤه ده‌رگه‌هـ ڤه‌بوو
سێ زه‌لام هاتن
ژنكا من برن
و ژنه‌كا دی
ل به‌ر ته‌نشتا من ده‌ینان.
**
زه‌لامێ خودانێ بوینباغا ڕه‌ش
زه‌لامه‌ك ب بوینباغه‌ك ڕه‌ش
ل ئاهه‌نگا ده‌هوه‌تێ
ب تنێ روونشتی یه
كه‌سێ ژ ڤه‌خوه‌ندیان ناس نەكر
ئه‌وی كه‌س ناس نه دكر.
**
ده‌مێ ئاهه‌نگێ ده‌ستپێكری
من دیت ژنه‌كا جوان
ب جلكێن سپی
و مه دیت دو زه‌لام
ب جلكێن ڕه‌ش و
بوینباغێن ڕه‌ش
یێ قه‌ستا وێ دکن.
