ڤێ هاڤینێ دێ یاسایا ئاشتیێ دەرکەڤیت
سەرۆکێ پەرلەمانێ تورکیا دیار دکەت ئەو ب هەموو رەنگەکێ کار دکەن دا کو ئێدی ل تورکیا چو شەڕ روو نەدەن و نها کارێن گەلەک باش هاتینە کرن و ڤێ هاڤینێ دێ یاسایا ئاشتیێ ل پەرلەمانێ تورکیا دەرکەڤیت و ئەو یەک ژی گەلەک گرنگە.
نومان کورتولمیش سەرۆکێ پەرلەمانێ تورکیا د چارچۆڤەیێ سەرەدانا خوە یا بۆ چیایێ جودی ل باکورێ کوردستانێ دا ل گەل هژمارەک ژ ئەندامێن پەرلەمانێ تورکیا بۆ دەزگەهێن راگەهاندنێ ئاخڤی و دیار کر، قووناغا ئاشتیێ بۆ تورکیا گەلەک گرنگە، ئەو تنێ بۆ راگرتنا شەڕی کار ناکەن، بەلکو وان دڤێت تورکیایەک نوو ب پشکداریا هەموو پێکهاتەیێن ل تورکیا دروست بکەن دا وەسا بشێن مەترسیێن ل سەر تورکیا ژی نەهێلن.
ناڤهاتی ئەو یەک ژی دیار کر، هەتا نها وان کارێن گەلەک باش کرینە، نها بەرهەڤی بۆ دەرئێخستنا یاسایا ئاشتیێ ل پەرلەمانێ تورکیا دهێتە کرن، بێگومان گەلەک بەندێن یاسایێ تەمام بووینە و ڤێ هاڤینێ دێ یاسا دەرکەڤیت، ب دەرکەفتنا یاسایێ ژی دێ قووناغەکا نوو بۆ تورکیا دەستپێکەت و بێگومان دێ ئەو یەک بیتە ئەگەرێ گوهۆڕینێن گەلەک مەزن بۆ تورکیا و گۆت: (مە دڤێت ب رێیا یاسایا ئاشتیێ هەموو چەکدارێن رێکخستنا پەکەکێ ڤەگەرنە ڤە تورکیا، دێ دەمەک بۆ وی کاری ژی هێتە دیار کرن، ئەو یەک ژ بۆ ئاشتیا جڤاکی و نەهێلانا شەڕی گەلەک گرنگە، ڤێ هاڤینێ دێ یاسا دەرکەڤیت و ئەم هیڤیدارین کو دەرئێخستنا یاسایا ئاشتیێ ببیتە ئەگەرێ پێشڤەچوونێن گەلەک باش بۆ ئاشتیێ و پێکڤەژیانێ و نەهێلانا شەڕی ل تورکیا).
سەرۆکێ پەرلەمانێ تورکیا د بەردەوامیا ئاخڤتنا خوە دا ئاماژە ب ڤێ یەکێ ژی کر، راگرتنا شەڕی بوویە ئەگەرێ دلخوەشیا هەموو وەلاتیێن تورکیا، نها دەلیڤەیەکا دیرۆکی بۆ ئاشتیێ و برایەتیێ هاتیە پێش، هەموو هێزێن سیاسی ل تورکیا ژی نها پشتەڤانیێ ل قووناغا تورکیا بێ تیرۆر دکەن، ئەو یەک ژی گەلەک گرنگە و گۆت: (بێگومان بابەت تنێ راگرتنا شەڕی نینە، مە دڤێت بناغا تورکیایەک نوو دروست بکەین، مە دڤێت د تورکیا نوو دا هەموو وەلاتی خوەدان هەمان مافی بن، کەس هەست نەکەت کو وەلاتیێ پلە دویە، ژ بۆ ڤێ یەکێ ژی مە دڤێت ب رێیا یاسایا ئاشتیێ و گوهۆڕینێن دستووری یا پێدڤی بهێتە کرن).
نومان کورتولمیش د دووماهیا ئاخڤتنا خوە دا بەحسێ ڤێ یەکێ ژی کر کو چو مەترسی ل سەر قووناغا ئاشتیێ نینن، د ناڤ جڤاکێ تورکیا دا پشتەڤانیەکا گەلەک مەزن بۆ ئاشتیێ هەیە و ئەو یەک ژی نیشا ددەت کو پێدڤیا تورکیا ب ئاشتیێ و پێکڤەژیانێ هەیە و بێگومان هەتا نها کارێن باش هاتینە کرن و دێ بەردەوام بین.
