ڤەکۆلین ل دەستپێکا سالا بھێت دێ ل سەر تاوانێن داعش ھێتە کرن
ئەڤرۆ نیوز، لەزگین جوقی:
رێڤەبەرێ گشتیێ کاروبارێن ئێزدیان دیار کر کو بەردەوام ئامارا ھێرشا تیرۆرستێن داعش بۆ سەر شنگالێ دھێتە گۆھۆرێن و دووڤ دووماھی ئامار ژی ھەتا نوکە ھژمارا گۆرێن بکۆم ل شنگالێ گەھشتیە 71 گۆرێن بکۆم و دو ھزار و 745 زارۆ ماینە ئێتیم.
خەیری بۆزانی، رێڤەبەرێ گشتیێ کاروبارێن ئێزدیان بۆ ئەڤرۆ دیار کر کو ھژمارا ئێزدیان ل عیراقێ دگەھیتە ٥٥٠ ھزار کەسان و 360 ھزار ئێزدی ژ بەر تیرۆرستێن داعش ئاوارە بووینە و د رۆژێن ئێکی دا ژ جینوسایدا شنگالێ ھزار و 293 کەس ھاتینە شەھیدکرن و شەش ھزار و 417 کەس ژ ھەر دو رەگەزان ھاتبوونە گرتن و رەڤاندن ژ وان سێ ھزار و 548 رەگەزێ مێ و دو ھزار و 869 رەگەزێ نێر بوون و ھەتا نوکە سێ ھزار و 334 کەس یێن ھاتینە رزگارکرن، ژ وان ھزار و 159 ژن و 337 زەلام و 962 زارۆیێن کچ و 876 زارۆیێن کور بوون و گۆت: “ھەتا نوکە سێ ھزار و 833 کەس د دەستێن تیرۆرستێن داعش دا ماینە ژ وان ھزار و ٤٢٧ ژ رەگەزێ مێ نە و یێن دی ژی رەگەزێ نێر ن”.
ناڤھاتی ئاماژە دا وێ چەندێ کو ھەتا نوکە 71 گۆرێن بکۆم یێن ھاتینە دیتن 68 مەزارگەھێن ئایینی یێن ئێزدیان یێن ھاتینە پەقاندن و دو ھزار و 745 زارۆ یێن بووینە ئێتیم ژ بەر ھێرشا ھوڤانە یا تیرۆرستێن داعش بۆ سەر شنگالێ ژ وان ھزار و 759 زارۆ بێ باب ماینە و 407 زارۆ ژی بێ دایک ماینە و 359 زارۆ ژی بێ دایک و باب ماینە و دایک و بابێن 220 زارۆیان ژی د دەستێن تیرۆرستێن داعش دانە و ھژمارا گۆڕێن ب کۆم ژی د زێدەبوونێ دانە”.
ژ ئالیێ خوە ڤە کەریم ئەسەد پارێزەرێ تایبەت یێ مافێن مرۆڤی ل جڤاتا ئاسایشا نێڤدەولەتی دیار کریە ل دەستپێکا سالا بھێت ڤەکۆلین دێ ل سەر تاوانیێن داعش دەست پێ کەت نوکە ئامادەکار یێن بۆ ڤێ چەندێ دھێنە کرن.
