کارۆخ خۆشناو: بریارەکا تیۆری بۆ سارێژکرنا برینا جادا شیعی
ئەڤرۆ نیوز ، زنار تۆڤی:
کارۆخ خۆشناو سەرۆکێ پەیمانگەها ڤەکۆلینێن کوردی ئەمریکی، بۆ ئەڤرۆ نیوز دیار کر: پەرلەمانێ عیراقێ ل ژێر هەژموونا جادا شیعی دا بریارا دەرکرنا هێزێن بیانی ب تایبەتێ هێزێن ئەمریکا ل عیراقێ دەرکر، کو تێدا حوکمەتا کاربرێکەر پابەند دکەت ب هەلوەشاندنا هەموو رێککەفتنان ب تایبەتی رێککەفتنا چارچۆڤێ ستراتیژی ئەمریکی _عیراقی، کو ب رێککەفتنا (سۆفا) دهێتە نیاسین، کو ژ ئالیێ وەزیرێن دەرڤە یێ عیراقێ و ئەمریکا ل (2008/11/17) هاتیە ئیمزا کرن، ئەڤ بریارا پەرلەمانێ عیراقێ بریارەکا تیۆریە و ب تنێ بۆ رازیکرنا جادا شیعیی یە پشتی کوشتنا قاسم سلێمانی و ئەبو مەهدی ئەلموهەندسی.
ناڤهاتی زێدەتر گۆت: یا ب زەحمەتە بریارەکا هوسا بچیتە وارێ پراکتیکی و جێبەجێکرنێ، چونکی ئەمریکا دەستبەرداری وزێ و پێگەهێ ستراتیژیێ عیراقێ نابیت و مەیدانا عیراقێ بۆ ئیرانێ چۆل ناکەت، چونکی ئەمریکا خوین ل عیراقێ دا رێژتیە و نێزیکی 5 هزار سەربازێن وێ هاتینە کوشتن، هەروەسا پتر ژ 3 ترلیۆن دولاران ل عیراقێ دا مەزاختینە، لەوما یا بەر ئاقل نینە ب بریارەکا سەرپێ ئەمریکا عیراقێ بۆ نەیارێن خوە چۆل بکەت، د دەمەکێ دا کو ب تنێ پێکهاتا شیعی ئەڤ بریارە دەرکریە و سونە و کوردان بایکۆتا وێ بریارێ کریە.
