کـورد ب توندی سـیاسەتا عەرەبکـرنێ ل رۆژئاڤایێ کـوردستانێ رەت دکـەن
کوردێن رۆژئاڤایێ کوردستانێ ل دژی سیاسەتا حوکمەتا شامێ دەست ب خوەنیشادانێن مەزن کرن و دژبەریا خوە ل هەمبەر سیاسەتا ب عەرەبکرنێ دیار کرن و راگەهاندن دڤێت ل سووریێ پەروەردەیا ب زمانێ کوردی ببیتە فەرمی.
کوردێن رۆژئاڤایێ کوردستانێ ل باژێرێن حەسەکێ، کۆبانێ، دیرکێ و چەندین باژێرێن دی دەست ب خوەنیشادانێن مەزن کرن و دژبەریا خوە ل هەمبەر سیاسەتا نها یا شامێ دیار کرن و راگەهاندن کو ئەو ب چو رەنگەکێ قەبوول ناکەن ناڤێن باژێر و گۆندێن وان ببنە عەرەبی و دڤێت شام رێزێ ل ئیرادە و داخوازیێن کوردان بگریت، چونکی بەری نها شامێ هەبوونا کوردان ب فەرمی قەبوول کریە و دڤێت دەست ژ سیاسەتا ب عەرەبکرنێ ژی بەردەت، هەکە شام ل سەر هەلوەستێ خوە یێ خراب بەردەوام بیت ئەو دێ ب هەموو رەنگەکێ نەرازیبوونا خوە دیار کەن و خوەنیشادانێن ل دژی شامێ ژی دێ بەردەوام بن.
وەلاتیێن باژێرێ کۆبانێ یێ رۆژئاڤایێ کوردستانێ ژی دیار کرن، کۆبانێ د ئاستێ جیهانێ دا بووویە ناڤەندا بەرخوەدانێ و ل کۆبانێ داعش تووشی شکەستنەکا مەزن هات و ژ بەر ڤێ یەکێ ژی ناڤێ کۆبانێ ئێدی د ئاستێ جیهانێ دا هاتیە نیاسین و نابیت جارەکا دی حوکمەتا شامێ ب جهێ کۆبانێ بێژیت عەین عەرەب، ئەو یەک ب چو رەنگەکێ ژ ئالیێ کوردان ڤە ناهێتە قەبوول کرن و دڤێت شام رێزێ ل داخوازیێن کوردان بگریت و هەمان سیاسەت و شاشێین رژێما بەرێ دوبارە نەکەت.
ل ئالیێ دی ب هزاران مامۆستایێن کورد ل رۆژئاڤایێ کوردستانێ ژی دیار کرن کو خواندنا ب زمانێ کوردی ل رۆژئاڤایێ کوردستانێ سەرکەفتنەکا مەزن بدەستڤە ئینایە و چەندین سالن زارۆیێن کورد ب زمانێ کوردی دخوونن و ئێدی نابیت جارەکا دی حوکمەتا شامێ داخواز بکەت کو پەروەردەیا ل رۆژئاڤایێ کوردستانێ ببیتە عەرەبی، ئەو یەک ب چو رەنگەکێ ناهێتە قەبوول کرن و دڤێت شام ب فەرمی پەروەردەیا ب زمانێ کوردی قەبوول بکەت و رێزێ ل داخوازیێن کوردان ل سووریێ بگریت.
ل ئالیێ دی رێڤەبەریا خوەسەر یا رۆژئاڤایێ کوردستانێ ژی دیار کر، یا نها شام ل هەمبەر رۆژئاڤایێ کوردستانێ دکەت ب تەمامی ل دژی وێ رێککەفتنێ یە کو بەری نها هاتیە کرن، ل گۆر رێککەفتنێ دڤێت شام رێزێ ل داخوازیێن کوردان بگریت و بێگومان بابەتێ زمانێ کوردی گەلەک گرنگە و نابیت ب جهێ کوردی پەروەردەیا ب عەرەبی ل سەر زارۆیێن کوردان بهێتە فەرزکرن و هەروەسا دڤێت شام دەست ژ سیاسەتا رژێما بەرێ بەردەت و ناڤێن دەڤەرێن کوردی ژی دڤێت هەر کوردی بن و سەپاندنا ناڤێن عەرەبی دێ بیتە ئەگەرێ ئالۆزیێن زێدەتر و ئەو یەک د بەرژەوەندیا چو ئالیەکێ دا نینە.
