کوردێن فەیلی ٤٠ سالن بێ رەگەزنامە نە
ئەڤرۆ نیۆز، قائید میرۆ:
سالا ١٩٨٠ێ رژێما ژناڤچوویا بەعس ھەوەک بۆ ژناڤبرنا کوردێن فەیلی دەستپێکر و د ئەنجامدا بھزاران کوردێن فەیلی بوونە قوربانی و ھژمارەک زۆرژی ھاتنە دەرخستن ل عێراقێ کەسایەتیەکێ فەیلی ژی ئاماژەکر، ھێشتا حوکمەتا عێراقێ رەگەزناما عێراقی نەڤەگەڕاندیە بۆ کوردێن فەیلی.
جەواد مەلکشاھی، کەسایەتیێ کوردێ فەیلی بۆ ئەڤرۆ نیۆز دیارکر” بەری ٤٠ سالان ژ لایێ رژێما بەعسا عێراقێ ڤە ھەوەکا جینۆسایدێ دژی کوردێن فەیلی ھاتە دەستپێکرن و ژبلی کوشتن و ئەشکەنجەدان و دەرکرنێ بھزاران کوردێن فەیلی ھاتنە دەرکرن ل عێراقێ و ناسناما عێراقی ل کوردێن فەیلی ھاتە وەرگرتن.
ئەڤی کەسایەتیێ کوردێ فەیلی ل بەغدا ئاشکراکر” پشتی بۆرینا ٤٠ سالان بسەر جینۆسایدکرنا کوردێن فەیلی ھێشتا دەستھەلاتدارێن عێراقێ نەشاینە مافێن کوردێن فەیلی وەک پێدڤی بدەن و بڕیارێن حوکمەتا بەعس کاریگەریا خوە مایە لسەر کوردێن فەیلی.
جەواد مەلکشاھی گۆتژی” گورەی دستوورێ عێراقێ فەیلی وەلاتیێن رەسەنێن عێراقێ نە، بەلێ ھیشتا ئاریشا رەگەزناما عێراقێ بۆ کوردێن فەیلی نەھاتیە چارەسەرکرن و دەمێ ئەم گەشتێ دکەین بۆ دەرڤە ژی سەرەدانا وان پشکا دکەین یێن بۆ وەلاتیێن بیانی ھاتینە دیارکرن.