کورد دێ ھەلویستی ھەمبەری پارێ نوو وەرگرن
ئەڤرۆ، سالار دۆسکی:
ئەندامەکا پەرلەمانێ عیراقێ ژ لیستا ھەڤپەیمانیا کوردستانی بۆ رۆژناما ئەڤرۆ دیار کر کو لیژنا دارایی و ئابووری و بەرھەمئینانێ یا پەرلەمانێ عیراقێ ئاگەە ژ دروستکرنا پارێ نوو یێ عیراقێ نینە، چێکرنا پارەکێ نوو د وی دەمی دا رازیبوونا حوکمەتێ ل سەر نەھاتبووکرن، دیسان پێدڤی ب قانوونەکێ بوو و دەربارەی دانا ٢٥ ملیۆن دیناران وەکو جەژنانە بۆ ئەندامێن پەرلەمانێ عیراقی گۆت “یا دوورە ژ راستی و چ بۆ نینە”.
نەجیبا نەجیب، ئەنداما ھەڤپەیمانیا کوردستانی ل پەرلەمانێ عیراقێ ئاشکرا کر، دەرکرن و چاپکرنا پارەی دڤێت ل دووڤ دەستووری بیت، دەستوور رژدیێ ل سەر دانانا ھەردو زمانێن کوردی و عەرەبی دکەت، ھەر پارەکێ دەرکەڤیت دڤێت ب ھەردو زمانان بیت و ئەوێ زمانێ کوردی ل سەر نەبیت دژی دەستووریە، چونکی مادێ چار ژ دەستوورێ عیراقێ رژدیێ ل سەر ڤێ چەندێ دکەت و گۆت “مە ئاگەە ژێ نینە کو زمانێ کوردی ل سەر پارێ نوو یێ عیراقی نینە، لێ دێ ل سەر ڤی بابەتی راوەستین”.
نەجیبا خانێ خویا ژی کر، پشتی جەژنێ دێ بەنکا ناڤەندیا عیراقێ ل سەر پرۆژێ لادانا سفران و پرۆژێن گرێدای ب بابەتی ڤە، کو ژ بەر رەوشا نوکە ھاتبوونە پاشخستن بۆ پەرلەمانی دێ داخواز کەین و گۆت “پرۆژی لادانا سفران، ئەو تشتێ بۆ کۆمپانیان ھاتیەدان کو بھێنە چێکرن و نڤیسینا کوردی ل سەر پارەی ئەم راوەستیابووین کو بەر ب فارسیێ دچوو، مە ئاگەھدار کربوون کو دڤێت ب کوردی بھێتە نڤسین”.
ئەنداما لیژنا دارایی ل جڤاتا نوونەرێن عیراقی گۆت ژی “ئەڤە پێنج سالە ئەز ئەندام پەرلەمان جارەکێ جەژنانە ب ڤی ئاوایی نەبوویە”.
