کورد پشکداریێ نەکەن حوکمەتا عێراقێ سەرناگریت
ئەڤرۆ نیۆز، قائید میرۆ:
بسپۆرەکێ زانستێن سیاسی ئاماژەکر، کورد پشکداریێ نەکەن حوکمەتا عێراقێ سەرناگریت و عێراقێ پێدڤی ب حوکمەتەکا نیشتیمانی ھەیە بۆ چارەسەرکرنا ئاریشەیان.
دکتۆر سالح مەلا عومەر، بسپۆرێ زانستێن سیاسی بۆ ئەڤرۆ نیۆز دیارکر” ئەگەر بھێت و کورد پشکداریێ د حوکمەتا نوویا عێراقێ دا بسەرۆکایەتی محەمەد عەلاوی نەکەن، ئەڤە بێگومان دێ حوکمەتەکا لاوازبیت و تەمەنێ ئەڤێ حوکمەتا نوو درێژ نابیت، چونکە حوکمەتێن دیژی فەشەل ئینایە و عێراق کەفتیە د چەندین قەیرانێن دژواردا، لەوڕا عێراقێ پێدڤی ب حوکمەتەکا بھێز یا نیشتیمانی ھەیە بۆ چارەسەرکرنا ئاریشەیان.
ئەڤی بسپۆرێ زانستێن سیاسی ئاشکراکر” بەری نوکە کورد و عەرەبێن سونەژی پشکداری حوکمەتا عێراقێ بووینە و ژبەر نەدانا مافێن وانا سەرکەفتی نەبووینە حوکمەتێن بۆری.
دکتۆر سالح مەلا عومەر دبێژیت” ھەگەر حوکمەتەکا بھێز نەھێتە پێک ئینان ئەڤە دێ ھێشتا قەیرانێن زێدەتر ل عێراقێ پەیدابن، بتایبەتی بەحسێ ھەلبژارتنێن بەروەخت دھێتەکرن، بەلێ حوکمەتا لاوازبیت نەشێت بەرھەڤیان بۆ رێڤەچوونا ھەلبژارتنێن بەروەخت بکەت.
