کوڕێ ئەڤرۆ
رزگارێ سالحی
مانا من بۆ دەمەکێ درێژ د مال دا، ئهز دلتەنگ کرم؛ ژ وێ بێدەنگییا خۆ د سەر هەر تشتهکی دا بەردایی ئهز ب تنێ نەبم. من هزر کر دێ یا باش و هاریکار بیت ئەگەر ب شەمهندەفڕێ بچمه گوندی بۆ ماوێ چەند ڕۆژەکان، دا ژ بن فشارێن هزرکرن و دیتنا دیمەنێن دوباره قورتال ببم؛ ژبەرکو ئەڤە دەمەکە خۆ ژ هەر تشتی ڤالا دبینم، هەتا ژ ئەڤرۆیا خۆ ژی، چونکی تێدا نەژیایمە ب تنێ دبۆرینم! بۆراندنەک کو چ ب تە کۆم نەبیت و چ ب تە ڕێک و پێک نەبیت، ئانکو بێهۆده بیت!
پشتی بەرهەڤکرنا بەرهەڤییێن خۆ، خاترخواستنا ژ خۆشتڤیان، و وەرگرتنا پلێتێ، ئهز چوومە ویستگەها شەمهندەفڕێ و سویار بووم. من سەری خۆ دگەل دەستەکێ خۆ دانا سەر پەنجەرێ، من لەشێ خۆ خاف دکر و چاڤێن خۆ دگرتن. من ڕێک ددا بایێ دویر یێ گوندی دا من هەمبێز بکەت، و تیڕۆژکێن ڕۆژێ ژی ب دلی خۆ روویێ من ماچی دکر. چەند جارەکان من ئەڤە دوباره کر، چونکی ئەڤە ئێکەم جاره هەست پێ دکەم ژیان بۆ من دگڕنژیت. من حەز ژ ڤی دیمەنێ خۆ دکر، بەلێ… (حەز ژ خۆکرن).
من هەست ب رویبارێ ئارامییێ د ناخێ خۆ دا دکر کو دبۆ لافاو و ژیان ب گیانێ من دبەخشی. بێ کو من ئاگەهـ ژ خۆ هەبیت، ئهز د خەوەکا کویر دا چوو بووم. پیرە ڕەبەنەکی (راهب) ل پەرستگەهێ کو ل ڕەخ من ڤە بوو، ئهز هشیار کرم بۆ خوارنا نانێ نیڤڕۆ و کڕینا پێدڤیاتییان ل دەمێ جار جار شەمهندەفڕ ڕاوەستیا. ل دەمێ مە ژ ویستگەهێ دایە ڕێ، ئەوی دڤیا وانەکێ نیشا من بدەت. دەمێ من بۆ وی بەحس ژ پاشەڕۆژێ کری و خەما من ژ ڕابردوویی، من ئهڤرۆیا خۆ ههر ژ بیر کربوو.
ڕهبهنی مۆزەکا ڕزی و بێهنگەنی ژ جانتکێ خۆ ئیناتەدەر و گۆت: تە ئاگەهـ ژێ هەیە ئەڤێ مۆزێ ژیانا خۆ یا ژ دەست دایی و ئیدی نازڤڕیتە ژیانێ ڤە؟ دەمێ گونجای یێ ژیانا خۆ ئەڤە هاتبا خوارن. (پاشان دانا ڕەخەکێ). مۆزەکا دی یا کەسک ژ جانتکێ خۆ ئیناتەدەر و گۆت: تو دبینی ئەڤ مۆزه هێشتا ژیان نەگەهشتیێ و ل هیڤیا دەمەکی گونجایی یه دا بژیت، و چ مفا د ڤێ ژی دا نینە. (پاشان دانا ڕەخەکێ دی).
ل دووماهیێ دو مۆزێن زەر ژ جانتکێ خۆ ئیناتەدەر، ئێک دا من و یا دووێ سپی کر و خوار. دگەل خوارنا مۆزێ گۆتە من: دڤێت د ئەڤرۆیا خۆ دا بژی، خۆشیێ ژ دەمێ تو تێدا ببینی. بەرێ خۆ نەدە ڕزی و گەنیبوونا ڕابردوویی، و دیسان دەست ژ کەسکاتییا پاشەڕۆژێ بەردە کو تو ل هیڤییا بەختێ خۆ بمینی. ئەڤرۆیا تە ئەنجامێ دوهی بوو و بوهارا پاییزا پاشەڕۆژا تە یە. تو ئەڤرۆیا خۆ ئاڤا بکه.
کوڕێ من، ژیان وەرزە. ئهو یێ کەیفخۆشە یێ د گەرم و گوڕا وەرزێ خۆ دا بژیت. مرۆڤێ گەهشتی ل دەمێ پیر دبیت ئاخینکێ ناڕاهێلیت بۆ گەنجاتییێ، چونکی د هەر دەم و وەرزەکێ دا خۆشی ژ حازریێ وەرگرتییە. نوکە ژی ژێدەرێ دلخۆشییا وی پیراتییە. یا بۆری نەشێی بگوهۆڕێ و یا دهێت نەشێی دەستنیشان بکەی.
دەستێن من د ناڤ دەستێن خۆ دا گڤاشتن و گۆت: دگەل ڕابردوویی ئاش ببه، ب هەمی خۆشی و نەخۆشییان ڤە قەبوول بکه و لاپەڕەکێ نوی دگەل پاشەڕۆژێ ئیمزا بکه. ئەڤرۆ دیارییەکە ژ دەڤ خودایی، خۆ بکه کوڕێ ئەڤرۆ.
من سوپاسییا وی کر کو ئهز یێ نڤستی ژ ئهڤرۆیا خۆ هشیار کریم. پشتی ئهم گههشتینە ویستگەهێ گوندی، من خاترا خۆ ژ وی خواست و من هەمبێز کر. د هەمبێزکرنێ دا وی گۆت: ڕێکا تە ڤەکری بیت کوڕێ من. دوباره ل خۆ بنێڕه دا د من بگههی، بەردەوامی دا ئاخفتنێ و گۆت: دێ ئەڤرۆ چ کەی؟
مە پێکڤە کرە کەنی!
