کچەکا کورد بۆ یا ئێکێ ل سەر ئاستێ قارەمانیەکا وەلاتێن عەرەبی
ئەڤرۆ نیوز،ھەژار مەعروف:
کچا کورد و یاریکەرا ھەلبژارتیێ عیراقێ ب یاریا پایسکلان سوزێ دلشاد شێیا رێزا ئێکێ و مەدالیا زێری ل سەر ئاستێ قارەمانیا وەلاتێن عەرەبی ل وەلاتێ مسرێ ب دەستخوڤە بینت پشتی شیایی ٢٧ کیلومەترا بریت کو ٢٠ کلیومەتر ب پایسکلێ بوون و ٧ کیلومەتر ب غاردانێ بوون کو شێوازێ ڤێ قارەمانیێ دەستپێکێ دێ ھەڤرکی ب چونا پایسکلێ دەستپێکەت پاش ل دووماھیێ ب چونا حەفت کیلومەترا ب غاردانێ بیت .
سوزێ دلشاد یاریکەرا یانا نەوروز یا سلێمانیێ د داخویانیەکێ دا بۆ ئەڤرۆ نیوز گوت : ئەڤە جارا دوێ یە پشکداریێ دڤێ قارەمانیێ دا کەم کو ل سالا بوری شیابووم رێزا دوێ ب دەستخوڤە بینم و ئەڤ جارە شیام مەدالیا زێری و رێزا ئێکێ ب دەستخوڤە بینم کو ١٤ وەلاتان پشکداری دڤێ قارەمانیێ دا کر و ھەڤرکیەکا ب ھێز دناڤبەرا یاریکەران دا ھەبوو ھەتا دووماھیێ.
سوزێ ئاماژە ب وێ چەندێ ژێ کر ئەو وەکو یاریکەرەکا کورد شیا ڤی ناسناڤی ب دەستخوڤە بینت گەلەک یا کەیفخوشحالە و ھیڤی دکەت پتر پشتەڤانی ب یاریا پایسکلان ل ھەرێما کوردستانێ بھێتە دانان و بەرپرسێن وەرزشی ب چاڤەکێ باشتر بەرێ خوە ب دەنە ڤێ یاریێ ھەر چەندە ھەتارادەکی پشتەڤانی بۆ وێ دھێتەکرن لێ نە ل ئاستەکێ پێدڤی .
ل دووماھیێ قارەمانا عەرەبان سوزێ دیارکر ھیڤا وێ ئەوە بشێت ل سەر ئاستێ قارەمانیا ئاسیا ژێ رێزا ئێکێ ب دەستخوڤە بینت و ئەو دێ ھەمی شیانێن خوە تەرخان کەت بشێت ل سەر ئاستێ ئاسیا ژی رێزەکا باش ب دەستخوڤە بینت.
