کۆنگرێسمانەکێ ئەمریکی:ئەم ل گەل خەلکێ کوردستانێ نە
ئەڤرۆ نیۆز،زنار تۆڤی:
کۆنگرێسمانەکێ پارتا کۆماری یا ئەمریکا دلنیایێ ددەتە گەلێ کوردستانێ و رادگەهینیت، ”ئەم یێ ل گەل هەوە“.
ترێنت فرانکس،کۆنگرێسمانێ پارتا کۆماری یا دۆنالـد ترەمپێ سەرۆکی ئەمریکا،بۆ K24 گۆتیە،ئەم پشتگیریا ریفراندۆما سەربەخۆیا کوردستانێ دکەین،هەروەسا ”ب کۆراتیا دلێ خوە هیڤیا دخوازیت،کو دەولەتا ئایندەیا کوردستانێ ”ببیتە ئەو دەولەت یا کو ئەم هەموو پشتگیریێ لێ دکەین“.
ترێنت فرانکس داخوازێ ژ گەل و سەرکردایەتیا سیاسی یا کوردستانێ دکەت،کو سەربەخۆیانە کار بکەن و سەر ب وەلاتێن تورکیا و ئێران نەبن،دبێژیت ژی ”هیڤی دکەم بتنێ هوون ب خوە بن و نەچنە پال وەلاتێن تورکیا و ئێرانێ“.
ئەو کۆنگرێسمانە دانپێدانێ ب هندێ دکەت،کو ئیدارا سەرۆکێ بەرێ یێ ئەمریکا باراک ئۆبامای وەکو پێدڤی هاریکاریا کوردستانی نەکریە د شەرێ دژی تیرۆرێ و پاراستنا کێم نەتەوەیان و ئاینێن کوردستانێ، زێدەتر گۆتیە”داخوازا لێبورینێ دکەم،کو هندەک جارا هەوە بتنێ شەر ل دژی تیرۆرستان دکر.
ترێنت فرانکس جەخت ل هندێ ژی دکەت،کو ئیدارا ئەمریکا ب سەرۆکاتیا دۆنالد ترەمپی دێ یا جیاواز بیت بۆ گەلێ کوردستانێ و راگەهاندیە،کو نوکە پەیوەندیێن گەلێ کوردستانێ و ئەمریکا ”ژ هەموو دەمان باشترن“.
ئەو کۆنگرێسمانێ ئەمریکی دلنیایێ ددەتە گەلێ کوردستانێ و دبێژیت،د ریفراندۆم و سەربەخۆیا کوردستانێ دا، ئەمریکا ل گەل کوردستانێ یە، ”ئەم ژی دێ پالپشتێن هەوە بین و ئەم یێ ل گەل هەوە،خودێ هەوە ب پارێزیت“.
