کۆنگرێسێ ئەمریکا: نابیت چەکێن گران و گەمیێن شەری بدەینە تورکیا
ئەڤرۆ:
کۆنگرێسێ ئەمریکا د روونشتنا خوە یا ل سەر سیاسەتا فرۆتنا چەکان بۆ وەلاتێن جیھانێ ھندەک بریارێن گرنگ وەرگرت و د روونشتنێ دا داخوازا تورکیا بۆ چەکێن گران و گەمیێن شەری ھاتە رەد کرن و ھاتە راگەھاندن کو تورکیا ب سیاسەتا خوە یا د ڤێ دەمێ دا باوەریا پێدڤی نەدایە کۆنگرێسێ و بۆ ڤێ چەندێ ژی فرۆتنا گەمی و چەکێن گران نە گونجاییە.
کۆنگرێسێ ئەمریکا ھەر سال ل سەر سیاسەتا فرۆتنا چەکان و ھەڤکاریێن سەربازی بۆ وەلاتێن جیھانێ روونشتنا تایبەت ساز دکەت و د روونشتنا رۆژا ٥\١\٢٠١٥ دا ل سەر رەوشا وەلاتێن ھەڤپەیمانێن ئەمریکا، وەلاتێن نێزیک و وەلاتێن ناڤین و دوور راوەستیا و بریار دا ھەڤکاریێن سەربازی بۆ ھەڤالبەند و ھەڤپەیمانان بەردەوام بکەت لێ رەوشا ھندەک وەلاتێن ھەڤپەیمان ب تایبەت ھاتە گەنگەشە کرن و بریارێن گرنگ وەرگرتن.
د روونشتنا کۆنگرێسێ دا داخوازا تورکیا بۆ کرینا چەکێن گران و گەمییێن شەری ھاتە رەدکرن و سەدەمێ رەدکرنا داخوازا تورکیا ژی ب ڤان سەدەمان ھاتە دیار کرن، ل دووڤ کۆنگرێسێ سێ سەدەمێن سەرەکی ھاتینە دەستنیشانکرن، یا یەکێ سیاسەتا دژوار یا تورکیا ل دژی ئیسرائیلێ، یا دویێ دەستێوەردانا تورکیا د کاروبارێن قوبروسا روم و ئاستەنگکرنا دەرخستنا پەترۆلێ ژ ئالیێ کۆمپانیایێن ئەمریکا ل دەریا سپی، یا د خالا سیێی دا ژی ھاتە دیار کرن کو حوکمەتا تورکیا د شەرێ ل دژی تیرۆرا قاعیدە و داعشێ ب کریاری ل گەل ھەڤپەیمانا نێڤدەولەتی جھـ نەگرتیە و وەک پێدڤی بۆ ژناڤبرنا ھەردو رێکخستنێن تیرۆریستی ھاریکاری نەدایە ھەڤپەیمانا نێڤدەولەتی ل سووریێ.
د ڤێ دەربارێ بسپۆرێن سیاسەتێ رادگەھینن کو ئەمریکا ل رۆژھەلاتا ناڤین ل دووڤ ھەڤالبەندەکی دی دگەریت کو سیاسەتا وێ نە ل دژی ئەمریکا و ھەڤپەیمانێن وێ بیت و تورکیا رۆژ ب رۆژێ دخوازیت سیاسەتەکا ل دژی بەرژەوەندیێن ئەمریکا ل رۆژھەلاتا ناڤین بجە بکەت و ژ خوە ژ رۆژا کو تورکیا خەونا ئیمپراتۆریا ئۆسمانیان دبینیت ئەمریکا ب دژواری رەخنە ل ڤێ سیاسەتا تورکیا دگریت و ڤێ سیاسەتێ ل دژی بەرژەوەندیێن خوە دبینیت.
ل ئالیێ دی پەیدارێ حوکمەتا تورکیا ژی پشتی کو کۆنگرێسا ئەمریکا داخوازا ھەڤکاریا چەکێن گران و گەمیێن شەری رەد کر، بێی کو بەحسێ کۆنگرێسا ئەمریکا بکەت راگەھاند تورکیا دەولەتەکا مەزنە و دشێت پێدڤیێن خوە یێن سەربازی دابین بکەت و گۆت: (ئەم وەلاتەکی مەزنین و ئەم دشێین ھەموو پێدڤیێن خوە دابین بکەین و وەسا خوەیایە ھندەک دەولەت یان ھێزێن نێڤدەولەتی ژ مەزنبوونا ئابووری و سیاسی یا تورکیا دترسن لێ ھەموو جیھان دبینیت کو تورکیا وەک رۆناھیەکا کەسک رۆژ ب رۆژێ مەزن دبیت و چو ھێزەک نەشێت رێ ل ھەمبەر مەزنبوونا تورکیا بگریت).
ل ئالیێ دی پەیڤدارێ کۆچکا سپی یا ئەمریکا د پرێس کۆنفرانسەکی دا ل راگەھاند کو رێڤەربەریا ئەمریکا چاڤەرێی وێ یەکێیە کو تورکیا زێدەتر رۆلێ خوە د ناڤ ھەڤپەیمانا نێڤدەولەتی دا بگێریت و د ھەر واری دا بۆ ژناڤبرنا ھەردو رێکخستنێن تیرۆرست یێن ب ناڤێ قاعیدە و داعشێ دەست ب خەباتەکا مەزن بکەت.
پەیڤدارێ کۆچکا سپی ھەروەسا راگەھاند ژی کو ھەتا قاعیدە و داعشێ ل سووریێ و عیراقێ ب تەمامی ژ ناڤ ببەن دێ ئۆپەراسیۆنێن وان بەردەوام بکەن و گۆت: (پشتی داگیرکرنا پشکەک ژ ئاخا عیراقێ و سووریێ ژ ئالیێ تیرۆرستان ڤە ئۆپەراسیۆنێن مە ھاتینە دەستپێکرن و د ئەنجامدا ژی ھەردو کۆمێن تیرۆرست دربێن گەلەک مەزن خوارینە و نەچار ماینە ژ ھندەک دەڤەران ڤەکێشن، لێ د رەوشا نھا دا ئەم دێ د وارێ چەکێن گران و ھاریکاریێن دی یێن لەشکری بەردەوام بین و ھەکە پێدڤی بوو دێ ھێزێن سەربازی ژی رەوانەی عیراقێ کەین).
