کۆنگرێس ئۆبامای تەنگاڤ دکەت
ئەڤرۆ:
ئاژانسا رویترز د راپۆرتەکێ دا دیار دکەت کو ئەندامێن کۆنگرێسێ ئەمریکا داخواز ژ ئۆبامای دکەن د شەرێ داعشێ دا ب رەنگەکی جدی ھاریکاریا کوردان و ھێزێن دی بکەت یێن کو شەرێ داعشێ دکەن و ھەروەسا داخواز ژ ئۆبامای دکەن کو ھژمارەکا زێدە سەربازێن ئەمریکی رەوانەی عیراقێ بھێتە کرن دا ب رەنگەکێ راستەوخوە شەرێ داعشێ بکەن چونکو لەشکرێ عیراقێ ئەو شیان نینن بشێت د ماوەیەکێ کورت دا داعشێ ژ عیراقێ دەرخینیت و ھەکە ئەو یەک نەھێتە کرن دێ زیانەکا مەزن گەھیتە بەرژەوەندیێن ئەمریکا.
د بەردەوامیا راپۆرتێ دا ھاتیە کو ئەندامێن کۆنگرێسێ ھەروەسا داخواز ژ ئۆبامای دکەن کو سزایێن نوو ل سەر ئیرانێ و روسیا بسەپینیت، چونکو دانوستاندنێن ل گەل ئیرانێ بێی ئەنجام ماینە و نابیت ئەمریکا وەسا ل ھەمبەر ئیرانێ نەرم بیت، چونکو ئەو یەک زیانەکا مەزن دگەھینتە ئەمریکا و گەلەک وەلاتێن دۆست و ھەڤپەیمانێ ئەمریکا ل رۆژھەلاتا ناڤین ژ وێ سیاسەتا ئۆبامای نەرازی نە.
د دووماھیا راپۆرتێ دا ھاتیە کو نھا ئۆباما گەلەک تەنگاڤ بوویە و ب پشتی ڤان گڤاشتنێن کۆنگرێسێ ژی نەچارە کو ھندەک گوھۆرینان د ستراتیژیا شەرێ دژێ داعشێ بکەت و رەنگە ھەلویستێ ئەمریکا ل ھەمبەر ئیرانێ و روسیا ژی ھندەکێ دژوار بیت و ھەکە ئۆباما ڤێ یەکێ نەکەت دێ ئالۆزیێن ناڤبەرا ئۆباما و ئەندامێن کۆنگرێسێ ب تایبەتی ژی یێن کۆماریخواز زێدەتر بن.
