کەنالێ mbc بەحسێ جوانی و قارەمانیا کچێن کورد دکەت
ئەڤرۆ نیۆز، ئەمیر ئەترووشی:
مالپەرێ کەنالێ (mbc) د راپۆرتەکا خوە دا ل دور کوردان بەحسێ کچێن کورد دکەت و ھوسا دیار دکەت کو ژ جوانترین کچانە ل جیھانێ و بەحسێ کچێن شاھجوان کر و ئەڤ بابەتە گرێدایە ب وان کچێن نھا شەری دژی داعش دکەت و بەحسێ قارەمانیا کچێن کورد دکەت.
د وێ راپۆرتێ دا ھاتیە، ژنا کورد جھەکێ بلند د ناڤ خێزان و جڤاکێ کوردی دا ھەیە، یا جوان و بەژن بلندە ب جلوبەرگێن خوە یێن کوردی و شیایە ھەموو مافێن خوە ل ناڤ جڤاکی وەربگریت و مافێن وێ ل گەل زەلامی یەکسان بووینە و ئەڤ یەکسانبوونە ژی نە تشتەکێ نوویە، بەلکو گرێدای کەڤناتیا جڤاکێ کوردی یە.
ھەروەسا د راپۆرتێ دا ھاتیە کو رۆژھەلاتناسێ روسی فاسلی نیکیتین د کەڤن دا گەلەک بەحسێ جوانیا کچێن کورد کریە و دیارکریە کو دەمێ ئەو د سەردەمێم کەڤن دا ل ناڤ کوردستانێ را بووری وی کچێن کورد گەلەک جوان دیتن و گۆت: (کچێن کورد جلوبەرگێن گەلەک جوان ل بەر خۆ دکەن و جوان برێڤە دچن و کچینیا وان یا پێشچاڤە و د بەژن درێژن).
د ھەمان دەم دا راپۆرتێ بەحسێ شاھجوانێن کوردان کریە کو ل سالا بووری (شێنێ عەزیز) شیابوو ببیتە ئێکەم شاھجوانا کوردستانێ و شیا ل سەر جوانیا ٥٠ کچێن ھەڤرک ب سەرکەڤیت و ئەڤ سالە ژی فێنک بوویە شاھجوانا کوردستانێ.
ل گەل ھندێ ژی بەحسێ قارەمانیا کچێن کورد کریە کو ھەردەم مل ب ملێ پێشمەرگەی و شەرڤانێن کورد شەر دژی دوژمنێ کوردان کریە ھەتا گەھشتیە وی رادەی ل شەرێ ڤێ دووماھیێ دژی داعش ھندەک ژن شەھید بووینە. ھەروەسا رێژا کچان د ناڤ لەشکەرێ کوردان دا ٣٠% یە و تەمەنێ وان ژی دناڤبەرا ١٨ ھەتا ٣٥ سالیێ دانە.
ھەروەسا گەلەک کچێن کورد ژی ل ڤێ دووماھیێ ل وەلاتێن بیانی و ئورۆپا و ئەمریکا رابووینە ڤە و ناڤداریەکا ئێکجار مەزن ب دەسخۆڤە ئینایە و شیاینە ببنە ناڤدارێن جیھانێ، وەکو ھونەرمەند ھێلی لۆڤ، ئیڤن وەھاب، خونیشاندەرا جلکان سازان بارزانی، دیدن شوانی و گەلەکێن دیتر.
