گازا سپی ل سەر قوتابخانەیێن دەڤەرا ئامێدیێ دێ هێتە بەلاڤكرن
ئامێدیێ، مەحمود نهێلی:
رێڤەبەرێ پەروەردەیا ئامێدیێ دیاركر، ل گەل دەستپێكرنا سالا نوو یا خواندنێ، وان بزاڤ كرینە هەموو ئاڕێشەیێن قوتابخانەیان چارەسەر بكەن و دبێژیت: گازا سپی یا یەدەك مە ل بەردەست هەیە.
وەجیهـ سەعید، رێڤەبەرێ پەروەردەیا دەڤەردارییا ئامێدیێ بۆ رۆژنەمەیا ئەڤرۆ دیاركر، پتریا ئاڕێشەیێن قوتابخانەیان ل دەڤەرێ هاتینە چارەسەركرن و میلاك هاتیە تمامكرن، هەر قوتابخانەیەكا مامۆستا یان فەرمانبەرێن وێ كێم ببن، ژ بەر خانەنشینیێ، جهێ وان هاتیە پڕكرن و گۆت: «پرتووك هەموو گەهشتینە قوتابخانەیان و ئاڕێشەیا پرتووكان مە نینە، دەربارەی بابەتێ ئاڤاهیان ژی ل دووڤ وان شیانێن مە ل بەردەست هەین، هەموو ئاڕێشە د هەموو ئاڤاهیان دا هاتینە چارەسەركرن».
گۆت ژی: «مە گازا سپی یا یەدەك ل بەر دەست هەیە و سالانە گازا یەدەك ئەم ل بەر دەست دهێلین، ئەڤ بابەتە هاتیە ئێكلاكرن و ل سالا بۆری سەرۆكێ حكومەتێ ل گەل وەزارەتا سامانێن سروشتی بابەتێ گازێ ئێكلا كریە و د دەمەكێ نێزیك دا دێ گازا سپی گەهیتە هەموو قوتابخانەیێن دەڤەرێ».
ل سنۆرێ پەروەدەیا ئامێدیێ 26 هزار و 305 قوتابی ل 153 قوتابخانەیان ئەڤ سالە دێ دەوامێ كەن ل گەل سێ هزار و 500 مامۆستا و 500 فەمانبەرێن پەروەردەیێ.
