گرنگە سەرۆككۆمارێ بهێت نوونەراتییەكا راستەقینەیا گەلێ كورد بكەت
دیدار/ دلۆڤان ئاكرەیی
ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان دیار كر، هەر بەربژارەكێ كورد كو مەرجێن پێدڤی بۆ وەرگرتنا پۆستێ سەرۆككۆمارێ ئیراقێ تێدا بن، پارتی دێ دەنگێ خوە دەتێ.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی، بۆ رۆژنامەیا (ئەڤرۆ) گوت» سەرۆك بارزانی د دووماهی كۆمبوونا دگەل مە وەك فراكسیۆنا پارتی ل جڤاتا نوونەران، داخواز كر ئەم ببینە نوونەرێن تەڤایا خەلكێ كوردستانێ و ئیراقێ بێی جوداهی، و بەرگریێ ژ ماف و داخوازیێن وان بكەین. نوكە ژی فراكسیۆنا پارتی بەرهەڤی و ئامادەكاریێن تەمام بۆ رێكخستنا كارێن خوە د ناڤ جڤاتا نوونەراندا كرینە؛ دێ پشكداری د تەڤایا لێژنەیێن جڤاتا نوونەرێن ئیراقێدا هەبیت و ژ بەر قەبارەیێ كورسیێن وێ، رەنگە ل هندەك لێژنەیان پارتی زێدەتر ژ نوونەرەكێ هەبیت».
سەبارەت پۆستێ سەرۆككۆمارێ ئیراقێ، ناڤبری گوت» پەیاما سەرۆك بارزانی یا دیارە؛ یا بۆ مە گرنگ، كەسەكێ كوردێ رەسەن و دلسۆز ڤی پۆستی وەربگریت، نە مەرجە یێ پارتی بیت یان یێ حزبەكا دی بیت. ئەم دێ ل دووڤ وێ پەیامێ كار كەین یا كو سەرۆك بارزانی ل رۆژا 29ی كانوونا ئێكێ یا 2025ێ راگەهاندی، كو جەنابێ وی چەند میكانیزمەك بۆ دیاركرنا نوونەرێ كورد پێشنیار كربوون؛ یان د ناڤ پەرلەمانێ كوردستانێدا، یان ژ ئالیێ فراكسیۆنێن كوردستانی ل بەغدایێ، یان ژی ئالیێن سیاسی كۆمببن بۆ دەستنیشانكرنا كەسەكی و مەرج نینە ئەو بەربژارە پارتی یان یەكێتی بیت».
سیپان شێروانی زێدەتر گوت» یا گرنگ ئەوە سەرۆككۆمارێ بهێت نوونەرایەتییەكا راستەقینەیا گەلێ كورد بكەت. ئەو كەسێ ڤی پۆستی وەربگریت، دێ پێدڤی بیت خەلكێ كوردستانێ ئەو باوەرییە پێ هەبیت كو نوونەرایەتیا وان دكەت. هەر بەربژارەكێ مەرج تێدا بن، فراكسیۆنا پارتی دێ پشتەڤانیێ لێ كەت، چ پارتی بیت یان هەر ئالییەكێ دی».
ل دۆر گرنگییا ئێكگرتنا كوردان ل بەغدا، دیار كر» ل وەختێ بۆری پارتێن شیعە جڤاتەك رێكخستییە ب ناڤێ (چارچۆڤەیێ هەماهەنگیێ) كو پترییا بڕیارێن خوە د ناڤ وێ جڤاتێ دا د دەن، سوننەیان ژی ب هەمان شێوە كار بۆ رێكخستنا بڕیارێن خوە كرییە. لەوما گەلەك گرنگە كورد ژی د ئێكگرتی و ئێكهەلوەست بن، نەخاسمە د بڕیارێن گرێدای پاشەرۆژ و ژیانا خەلكێ كوردستانێ و پرسێن نیشتیمانیدا»
