گه‌نجه‌ك ل ده‌ڤه‌را بارزان د رووبارى دا خه‌ندقى
ئه‌ڤرۆ نیوز، نه‌وزاد هلۆرى:
ب مه‌ره‌ما گرتنا ماسیان و بوراندنا ده‌مه‌كێ خوش، هژماره‌كا گه‌نجێن ئاكرێ قه‌ستا سه‌ر رووبارێ زێى مه‌زن ل ده‌ڤه‌را بارزان كر، ئێك ژ وان گه‌نجان ژ ئه‌گه‌رێ نه‌شاره‌زایێ د روبارى دا خه‌ندقى و هه‌تا نوكه ته‌رمێ وى نه‌هاتیه دیتن.
عیماد رێكانى به‌رپرسێ به‌ره‌ڤانیا باژێرى ل ده‌ڤه‌را سوران بۆ ئه‌ڤرۆ نیوز گۆت: (ده‌مه‌كێ كێم به‌رى نوكه هژماره‌كا گه‌نجان ب مه‌ره‌ما گرتنا ماسیان و بوراندنا ده‌مه‌كێ خوش قه‌ستا سه‌ر رووبارێ زێ مه‌زن ل ده‌ڤه‌را بارزان كر، جهێ داخێ یه ئێك ژ وان گه‌نجان ژ ئه‌گه‌رێ نه شاره‌زایێ د مه‌له‌ڤانیان دا خه‌ندقى).
زێده‌تر گۆت: (ناڤێ وى یاسر شیمال ه و خه‌لكێ گه‌ره‌كا بیوك یا سه‌ر ب باژێرێ ئاكرێ یه، تیمێن نقومڤانێن بلێ و سوران مژولێ لێگه‌ریانا ته‌رمێ وى گه‌نجى نه، به‌لێ جهێ داخێ یه هه‌تا نوكه ته‌رمێ وى نه‌هاتیه دیتن، تیمێن مه دێ به‌رده‌وام بن هه‌تا كو ته‌رمێ وى دهێته دیتن).
ناڤبرى دیاركر ژى كو ئه‌ڤه دبیته ئێكه‌م حاله‌تێ خه‌ندقیا وه‌لاتیان ل ده‌ڤه‌را بارزان و گۆت ژى: (به‌رى سێ رۆژان ته‌رمێ وه‌لاتیه‌كێ شێلادزێ ل ده‌ڤه‌را بارزان ل نێزیك كومه‌لگه‌ها وه‌لاتى ژێرى هاته دیتن، دیسان ل سوران ژى به‌رى نوكه وه‌لاتیه‌ك خه‌ندقى بوو و كه‌سه‌ك ژى به‌رى ب خه‌ندقیت ژلایێ تیمێن به‌ره‌ڤانیا باژێرى ل سوران هاته رزگاركرن).
