گۆڕستانا سپی
سولین محسن
هندەک کەسێن هەیین، هەر دەما دلێ وان ب خەم و ژانەکێ هاتە گڤاشتن، ئێکسەر قەستا ناڤ خەلکی دکەن و حەز دکەن ب ئاخفتنێ ئەوێ ژانا دلێ خۆ تەنا بکەن؛ جاران بۆ هەڤالەکی دئاخڤن و جاران ژی بۆ بیانیەکی.
بەلێ ئەو…
دەمێ ژان کونجا دلێ وی دبینیت بۆ ڤەحەوانێ، ئەو پەنایێ بۆ کاغەزەکا سپی دبەت، کو هندەک هێلان خۆ بۆ ب ڕێز کرینە داکو ئەو ئازار و ژانا خۆ ل سەر وان بڕێژیت، و پێنڤیسەکێ سەرێ وی ژ دەرزیێ تیژتر، کو جاران ژبەر زراڤیا وی دبەر نڤیسینێ ڕا تووشی شکەستنێ دبیت، هەروەکی دبێژتە وی: ئازارا تە گەلەک دژوارە، سەحکێ خۆ ئەز خۆ ل بەر ناگرم و ئەزێ دشکێم، ئەز باش دزانم تو هەست ب چ دکەی، پێدڤی ناکەت باخڤی، بتنێ هزر بکە و دارشتن خەما منە…
وەی بۆ وی! ما ئەڤە چ هەڤالن وی بۆ خۆ هەلبژارتین…؟!
هەر دەم وی دگۆتە من: چەوا هوین ب ئاخفتنێ ئارام دبن د دەمەکێ دا پێنڤیس و لاپەڕ هەبن؟!
بەلێ ئەوی نڤیسین هەلبژارت ژبەرکو کەسەک نەبوو وەکی کاغەزێ و ڕێزێن وێ ب بێدەنگی و ب حەژێکرن گوهداریا وی بکەت، بێی خۆ ل سەر سەرێ وی بکەتە زانا و کۆمەکا شیرەتان بدەتە بەرسینگێ وی. وێرەکی نەبوو بۆ هەڤالەکی باخڤیت؛ چونکی ئەو باش دزانیت هەڤالێ وی بتنێ های ژ پەیڤێن وی هەیە، د هەستێن وی ناگەهیت و های ژ ژانا دلێ وی نینە…
جاران، ژبلی هەمبێزەکا گەرم، مە پێدڤی ب چو ددی نینە.
ئەو مرۆڤەکە ل دەمێن ئاسایی هەر تشتی جوان دبینیت، بەلێ دەما خەم و ژانا شیا خۆ بگەهیننە ناڤ دلێ وی، ئەو دبیتە مەزنترین هۆزانڤانێ خەمان! خۆ دێ بێژی نە ئەو کەسێ بەری نوکەیە! هەمی جوانیێ کرێت دبینیت، هەمی ڕەنگان ب ڕەش دبینیت، خۆ دێ بێژی ب دلی ژیانێ دبینیت…!
دەمێ گوهـ ل ئاوازێن بلبلان دبیت، ل جهێ دلێ وی پێ خۆش ببیت، دبێژیت: ما کێ گۆتیە ئەڤە ئاوازێن خۆشیێ نە ئەو دخوینن؟ بەلکی ئەو ژی ئازارا بەرزەبوونا دلدارا خۆ دخوینیت…! خۆ ئەو ب جوانی و نازداریا پێلێن دەریایێ ژی سەرسام نابیت، دبێژیت: پێل حەز دکەن ژ ناڤ ڤێ كویراتیێ بڕەڤن و ب سەر باژێری دا وەربن، بەس هوین مرۆڤێن خۆپەرێس، هوین حەز دكەن ل بەر بزاڤێن وان یێن تژی ئازار بیرهاتنێن رۆمانسی بۆ خۆ دروست بکەن!
جاران ل بەر من ژی بەرزە دبیت، هزر دکەم بەلکی ڕاست دبێژیت!
بۆ کاغەزێ دنڤیسیت کو ڕۆژ ئاڤا دبیت و دچیت نە ژبەر دەمێ چوونا وێ یە، بەلکی بێهیڤی دبیت ژ هاتنا هەیڤێ، لەورا دچیت!
دبێژیت: هەیڤ ژی خاین و درەوینە، ب ڕۆژێ خۆ ل ڕۆژێ دڤەشێرت و پاشی ب وێ ڕوناهیا ئەو ژ ڕۆژێ وەردگریت سەمایێ دکەت و ستێران ب گەشاتی و جوانیا خۆ مەست دکەت، ئاخر ئەو چ نینە ژبلی کۆمەکا بەرێن تاری…!
ئەز هزر دکەم ڕۆژەکێ دێ لاپەڕ ژی هێنە ئاخفتن و دێ بێژنێ: بەسە… ما ئەڤە چ تشتەکێ بێ ڕامانە تو ل سەر من ب ڕێز دکەی.
ئەز هزر دکەم لاپەڕان زمان نینە، لەورا پەنایێ بۆ وان دبەت. جاران ژی هزر د مەزنیا ئازارا وی دا دکەم؛ تو بێژی هەتا چ ڕاددە ئێشابیت هەتا ب ڤی چاڤی تەماشەی ژیانێ بکەت؟ بەلێ خۆ چەوا بیت، ما مرۆڤ دشێت هندە ڕەشبین بیت؟!
