گەشتوگوزارا وەرزشی ل زاخۆ دێ بیتە ژێدەرەكێ داهاتی
زاخۆ، دلۆڤان هالۆ:
ل وان وەلاتێن ڤەژەنا گەشتیاری د لەزاتیەكا ڕێكخستی یا پێشڤەچوونێدا، پلانێن دۆمدرێژ بۆ كەرتێ گەشتوگۆزارا وەرزشی دهێتە دانان كو ببیتە ئەگەرێ باشتركرنا ژێدەرێ داهاتێ نیشتیمانی، لەوڕا د شیاندایە گەشتوگۆزارا وەرزشی ل زاخۆ ببیتە ژێدەرەكێ داهاتێ نیشتیمانی، چونكی یانەیا زاخۆ یا وەرزشی ئێكە ژ وان سازیێن گرنگ كو دشێت ڕۆلەكێ بەرچاڤ د ڤی بواریدا بگێڕیت و وەرارا گەشتوگۆزارا وەرزشی ل زاخۆ پێشڤە ببەت.
گەشتیارناس كاروان عزەددین تەها، زێدەتر بۆ ڕۆژناما ئەڤرۆ دیار كر، ب چەندین شێوەیان وەرزشا زاخۆ دشێت خزمەتا پێشڤەبرنا كەرتێ گەشتوگۆزارێ بكەت وەكو ڕێكخستنا قارەمانی و خۆلێن مەزن، زاخۆ ژی پشتی برنا خەلاتێ باشترین پشتەڤانێن جیهانێ زەبێست، گەشتیار و یاریزانێن بیانی سەرەدانا باژێرێ زاخو دكەن بۆ دیتنا دیمەنێن جوان و سەرنج ڕاكێش یێن پشتەڤانێن یانا زاخۆ، هەر دیسا پربوونا هۆتیل و مۆتێل و خوارنگەهـ و بازاران كو ڕاستەوخوە ئابوورا دەڤەرێ پێش دئێخیت.
گەشتیارناس كاروان دبێژیت:»گەشتوگۆزارا وەرزشی یا چالاك تایبەتە ب وان گەشتیاران ڤە كو ئەو بخوە چالاكیێن وەرزشی ئەنجام ددەن، نە ب تنێ بۆ تەماشەكرنێ وەكو سەرەدانكرنا دەڤەرێن چیایی بۆ چیاڤانیێ یان خلیسكانا ل سەر بەفرێ د وەرزێ زڤستانێ دا».
گۆت ژی: «ئاڤاكرن و پێشئێخستنا ژێرخانەیا باژێڕان بۆ مێهڤانداریا وەرزشڤان و پشتەڤانان، حكۆمەت و كەرتێ تایبەت ب هەڤكاری ل گەل سازیێن وەرزشی نەچار دبن ژێرخانا باژێڕی نوو بكەنەڤە، وەكو ئاڤاكرنا هۆتێلێن نوو و چێكرنا ڕێكێن هاتنوچوونێ و پرا و هێلێن ئینتەرنێتێ و كێشانا كارەبێ، هەر دیسا پێشئێخستنا فڕۆكەخانە و تۆرێن ڤەگۆهاستنێ».
زێدەتر ژی گۆت:»ب نیاسینا كەلتوور و ناڤودەنگیا باژێرێ زاخۆ وەرزش دێ وەكو هێزەكا نەرم كار كەت، بۆ نموونە ل دەمێ یاری ب شێوەیەكێ ڕاستەوخوە ل كەنالان دهێنە نیشاندان، ملیۆنان كەس ژ هەموو جهان دێ سرۆشت و كەلتوور و جوانیا زاخۆ بینن، ئەڤە ژی دبیتە ڕیكلامەكا بێ بەرامبەر دا كو د پاشەڕۆژێ دا گەشتیار سەرەدانا وی جهی بكەن، ئەڤ چەندە دێ وەرزشا كوردستانێ ب گشتی و یانا زاخۆ ب تایبەت بەرەڤ پێشڤەبەت».
