گەفێن واشنتۆن و بێهنتەنگییا چارچۆڤەیا هەماهەنگیێ، حەشد د دەرگەهێ گوهۆڕینێن چارەنڤیسساز دا
پشتی سەرەدانا جەنەڕالێ ئەمریكی دەیڤید پێترایوس بۆ بەغدایێ، پەیامێن واشنتۆنێ ل دۆر چەكێ گرۆپێن چەكدار یێن ئیراقی گەهشتنە ئاستەكێ چارەنڤیسساز. ژێدەرێن سیاسی ئاماژە ب وێ دكەن كو بەرسڤێن ئەمریكی «نەهەدەركەرن» و واشنتۆنێ ب توندی رێك ل بەر پشكدارییا كەسایەتیێن گرێدایی ب وان گرۆپان ڤە ل دەڤ حوكمەتا نوو گرتییە، دیسان دۆلار و ئابۆری ب كار دئینیت وەكو كارتێن گڤاشتنێ.
د ڤێ قۆناغێ دا، موقتەدا سەدر ب پێنگاڤەكا چاڤەڕێنەكری، پەیوەندییا «سەرایا سەلام» ل گەل باسكێ سەدری هەلوەشاند و داخوازا رادەستكرنا چەكی ب دەولەتێ كر، ئەڤە ژی بووە ئەگەرێ ئێخستنا «چارچۆڤەیا هەماهەنگیێ» د ناڤ بێهنتەنگییەكا سیاسی دا. دەمێ پترییا گرۆپان دگەڕن ل دووڤ رێككەفتنان بۆ پاراستنا پێگەهێ خوە، ئەڤ پێنگاڤا سەدری وان دئێخیت بەر بەرپرسیارییا رادەستكرنا چەكی، یان ژی دانپێدان ب لاوازبوونا خۆ.
پێزانین دیار دكەن كو سەرۆك وەزیران عەلی ئەلزەیدی ب هەماهەنگی ل گەل موقتەدا سەدر، بزاڤێ دكەت رێككەفتنەكێ ل گەل ئالیێن سیاسی بكەت بۆ دوورئێخستنا كەسایەتیێن گرێدایی ب چەكداران ژ پۆستێن وەزاری. لێ ژ ئالیێ دی ڤە، گرۆپێن وەكو «نوجەباو» و «كتائب حزبوللا» ب توندی دژایەتییا هەر بزاڤەكا رادەستكرنا چەكی دكەن و دزانن ئارمانج ژ ڤان گوهۆڕینان، لاوازكرن و هەلوەشاندنا «حەشدا شەعبی» یە ب ناڤێ رێكخستنا تەناهیێ.
هەتا نها، د ناڤ «چارچۆڤەیا هەماهەنگیێ» دا دووبەرەكی هەیە، پێنچ گرۆپ بەرهەڤن ل گەل دەولەتێ رێككەڤن، لێ گرۆپێن دی دچنە سەر وێ باوەرێ كو «داگیركار» ب رێیا گڤاشتنێن ئابۆری دەستێ خۆ دئێخیت ناڤ ناڤخوەیا ئیراقی دا. ب ڤێ چەندێ، مژارا چەكی د ئیراقی دا ژ ئاستێ دانوستاندنێن بێ دەنگ دەركەڤتییە و بوویە ژێدەرێ ئالۆزیێن كوور، دەمێ گەنگەشە ل سەر «وزارەتا ئاسایشا فیدرالی» وەكو چارەسەرییەك هاتییە كرن، ئەڤە ژی دەرخستنا وێ چەندێ دكەت كو پاشەڕۆژا حەشدا شەعبی د پرۆسەیەكا نەدیار دا دژیت، دەمێ ئەمریكا دەرفەتێ نادەتە هەر جۆرە هەلوەستەكێ دی یێ كو دژایەتییا سیاسەتێن وێ بكەت.
