ھژمارەکا پرۆژان بۆ رزگاربوویێن دەستێن داعش ھاتنە ڤەکرن
ئەڤرۆ نیوز، لەزگین جوقی:
بەرپرسێ بنگەھێ لالش یێ رەوشەنبیری و جڤاکی تایێ شاریا دیار کر کو ل کۆمەلگەھا شاریا ٤١ پرۆژێن بچووک بۆ کچ و ژنێن رزگاربوویێن دەستێن تیرۆرستێن داعش و کێم دەرامەتێن ئاوارێن شنگالێ ھاتنە ڤەکرن.
دلگەش سەلیم، بەرپرسێ بنگەھێ لالش یێ رەوشەنبیری و جڤاکی تایێ شاریا بۆ ئەڤرۆ نیوز دیار کر کو وەک پشتەڤانی بۆ کچ و ژنێن ئێزدی بۆ پەیداکرنا داھاتەکی خۆمالی، بنگەھێ لالش تایێ شاریا ب پشتەڤانیا رێکخراوا (JDA)یا ئەمریکی رابوون ب ڤەکرنا ٤١ پرۆژێن بچووک بۆ کچ و ژنێن رزگاربوویێن دەستێن تیرۆرستێن داعش و کێم دەرامەتێن ئاوارێن شنگالێ یێن کو ل کۆمەلگەھا شاریا د ئاکنجی.
ناڤھاتی ئاماژە دا وێ چەندێ کو پرۆژێن ھاتینە ڤەکرن مینا دکانێن کەلوپەلێن خوارنێ، جوانکاریێن ئافرەتان، پەز، دکانێن گەرۆک، پەرگەھـ، کەلوپەلێن دروارێ و تەباخیێ ب خوە ڤە گرتبوون، کو ل دووڤ حەز و داخوازا وان ھاتینە ھەلبژارتن و گۆت: “سەرجەمێ دراڤێ بۆ پرۆژان ھاتیە تەرخانکرن ٢٤ ھزار و ٦٠٠ دۆلارێن ئەمریکی بوون، بۆ ھەر کچ یان ژنەکێ ٦٠٠ دۆلار ھاتنە دان بۆ ڤەکرنا پرۆژێ خوە”.
ل دووماھیێ بەرپرسێ بنگەھێ لالش یێ رەوشەنبیری و جڤاکی تایێ شاریا خویا کر کو د پلاندایە ل داھاتی ئەڤ جۆرە پرۆژە بەردەوام بن بۆ ھندێ ژمارەکا مەزن ژ کچ و ژنێن کێم دەرامەت مفادار ببن.
