ھێرشبەرەکێ زاخۆ ھەڤبەستا برایەتی ئیمزاکر
ئەڤرۆ،ھەژار مەعروف:
ھێرشبەرێ گەنج یێ یانا زاخۆ ئەوێ ل وەرزێ بوری شیا ئاستەکێ بلند ل گەل تیما زاخۆ یا پشکدار دخولا عیراقێ دا پێشکێش بکەت عەبدرزاق محەمەد ب شێوەیێ خواستن ژ یانا زاخۆ ھاتە ڤەگوھاستن بۆ یانا برایەتی بۆ پشکدار کرنێ د یاریێن چار گوشا زێرینا خولا عیراقێ دا بۆ سەرکەفتن بۆ خولا پلا نایاب ئەوا بریارە ل حەفتیا بھێت ھەڤرکیێن وێ بھێنەکرن ل باژێرێ بەغدا.
یاریزانێ ناڤبری د داخویانیەکێ دا بۆ ئەڤرۆ دیارکر سوپاسیا کارگێریا یانا زاخۆ کەم بۆ وێ چەندێ دەلیڤە دایێ بۆ کرنا یاریێ ل گەل یانا برایەتی ل ڤی ماوەی و د بینت دێ پشکداریا وی ل گەل برایەتی بیتە باشترین دەلیڤە بۆ وی خوە باشتر بینتە پێش بۆ یانێن خولا عیراقێ و باوەریەکا مەزن ب شیانێن خوە ھەیە دێ شێت ئاستەکێ بلند د ڤێ قارەمانیێ دا پێشکێش کەت.
ناڤبری سەبارەت چونا وی ژ یانا زاخۆ بۆ برایەتی دیارکر یانا زاخۆ بتنێ دەست بەردانا وی دایێ بۆ یاریێن چارگوشا زێرینا خولا عیراقێ و پشتی یاریێن خولێ ب دووماھی دھێن ئەو دێ ڤەگەریتە یانا زاخۆ ژبەرکو ئەو ب شێوەیێ خواستن چویە یانا برایەتی.
ھەژی گوتنێ یە عەبدرزاق محەمەد دەستپێکا خوە یا وەرزشی ل گەل یانا زاخۆ دەستپێکری یە ژ تیمێن لاوان و پێگەھشتیان و پاش ل تیما ئێکێ یا خولا کوردستانێ و چاڤەرێ دھێتەکرن ل سالا بھێت ژ یاریزانێن تیما خولا عیراقێ یا زاخۆ بیت.