ھێشتا قانوونێن کوردستانێ ھەمی تاوانان بخوەڤە ناگریت
ئه‌ڤرۆ:
شەھرەزایەکێ قانوونی ئاماژە ب ڤێ چەندێ دکەت کو قانوونا سزادانا عێراقی ل سالا ١٩٦٩ێ ھاتیە دەرکرن و پێدڤیە ل دەمەکێ زوودا بھێتە راستڤەکرن، ژبەر کو ھندەک تاوان ھەنە وی سەردەمی نەبووینە و نوکە زۆرن، بۆ نموونە ئامیرێن پەیوەندیان و جینۆساید و گەندەلیا ئیداری زۆربوویە و وی سەردەمی نەبوویە، راستڤەنەکرنا قانوونا سزادانێن عێراقی ڤالاھیەکا مەزن د بیاڤێ قانوونی دا پەیداکریە و پێدڤیە دەمەکێ زوودا بھێتە راستڤەکرن و ھەموو ئەو گۆھۆڕینێن نوکە پەیدا بەرچاڤ بھێنە وەرگرتن.
کرمانج ئوسمان شەھرەزایێ قانوونی بۆ رۆژناما ئەڤرۆ دیارکر، کو قانوونا سزادانا عێراقی پێدڤی ب راستڤەکرنێ ھەیە و گۆت: قانوونا سزادانا عێراقی یا ھژمار ١١١ یا سزادانا عێراقی لسالا ١٩٦٩ێ ھاتیە دەرکرن، وی دەمی ھەتا نوکە زۆر گۆھۆڕین چێبووینە و ئەڤە چەندین حوکمەت ل عێراقێ تێنە گۆھۆڕین، بەلێ قانوون ھەر یا وی سەردەمیە، لەوڕا یا فەرە دەمەکێ زوودا بھێتە راستڤەکرن، دەربازبوونا دەمی کاریگەری ل سەر ھەموو قانوونەکێ ھەیە و زۆر جارا دێ بینی دەمێ قانوون تێتە دەرکرن تشتەکێ باشە، بەلێ گۆھۆڕین دێ پەیدابن و بڕگە و ماددەیێن ناڤا قانوونێ دێ وەکی خوە بن و ژلایێ قانوونی ڤە ئاریشە پەیدا دبن، سالا ١٩٦٩ێ ھەتا ئەڤرۆ زەمانەکێ درێژە و وی دەمی ھندەک جۆرێن تاوانان ھەبوون و نوکە نەماینە، یانژی باشترە بێژین وی دەمی ھندەک جۆرێن تاوانان نەبووینە و نوکە د مشەنە، بۆ نموونە وی دەمی مۆبایل نەبوویە و ئامیرێن ئەلکترۆنی ب گشتی لاوازبووینە، بەلێ نوکە تاوانێن مەزن بڤان جۆرە ئامیران تێنەکرن.
کرمانجی گۆتژی: تاوانێن گەندەلیێ و جینۆساید و زۆر تاوانێن دی ھەنە، سەردەمێ بەرێ نەبووینە یان ژی رژێما وی دەمیا عێراقی نەخواستیە گورەی قانوونێ تاوانبار بھێنە سزادان، نوکە پێدڤیە قانوون بۆ ھەموو تاوانان بھێنە دەرکرن و سزایێ تاوانباران بھێتەدان، راستە بەری نوکە ل ھەرێما کوردستانێ ھژمارەک قانوون ھاتینە دەرکرن، بەلێ دڤێت چوارچوڤێ سزایێن کەسی دابیت و بھێنە بجە ئینان، راستڤەنەکرنا قانوونا سزادانێن عێراقی و ھەموو بادەکێن نوو ڤالاھیەکا قانوونی ل کوردستانێ و عێراقێ پەیداکریە و زۆربەیا تاوانباران ناھێنە سزادان گورەی قانوونێ.
