ھەلویستێ تیمێن باکوورێ کوردستانێ د لیگایێن تورکیا دا
ئەڤرۆ نیوز، ھەژار مەعروف:
د چارچوڤێ یاریێن خوە یێن ڤێ حەفتیێ ژ یاریێن یانێن باکوورێ کوردستانێ د خولێن تورکیا یا تەپا پێ دا چەند تیم ب ئەنجامێن باش ڤەگەریان و چەند یانە ئەنجامێن نە چاڤەرێکرێ تۆمارکرن.
د خولا پلا ئێک دا تیما ئورڤا سپور بەردەوامی دا ئەنجامێن خوە یێن باش ل وەرزێ ئەڤ سالە پشتی شیا سەرکەفتنەکا گرنگ ل سەر تیما مانیسیا سپور تومار بکەت ب گولەکێ بێ بەرامبەر و خالێن خوە گەھاندنە 17 خالا رێزا دوێ دھێت کێمتر خالەکێ ژ تیما رێزا دوێ ژ لایەکێ دی ڤە.
ژ یاریێن خولا پلا دو تیما یانا مالاتیا ب سێ خالێن گرنگ ژ باژێرێ ئەنقەرە ڤەگەریا پشتی سەرکەفتی ل سەر تیما حەجی تەپا ب دو گولان بێ بەرامبەر و خالێن خوە گەھاندنە 22 خالا رێزا دویێ پاراست و تیما ئامەد سپور ل ناڤ یاریگەھا خوە دا نەشیا سەرکەفتنێ تۆمار بکەت دەمێ وەکھەڤ بووی ل گەل یانا گوموشەھانە سپور ب گولەکێ و ئامەد ل رێزا نەھێ دھێت ب 11 خالان کێمتر دو یاریان ژ تیمێن دی.
ژ لایەکی دی ڤە ژ یاریێن خولا پلا سێ د یاریێن کۆما ئێکێ دا ھەردو تیمێن باتمان سپور و ڤان سپور بەردەوامی دا ئەنجامێن خوە یێن لاواز ل وەرزێ ئەڤ سالە تیما باتمان ل یاریگەھا خوە وەکھەڤ بوو ب گولەکێ ل گەل شەکیر سپور ب گولەکێ و خالێن خوە گەھاندنە نەە خالان رێزا چواردێ دھێت و تیما ڤان سپور ئەوا نوکە ل رێزا بەری دووماھی دھێت د کۆما خوە دا ئەو ژی ب گولەکێ ل ڤێ حەفتیێ وەکھەڤ بوو ل گەل ئایڤەلیک گوجو ب گولەکێ و خالێن خوە گەھاندنە ٥ خالان ل رێزا 17 دھێت.
تیما یانا دیاربەکر ئەوا نوکە رەوشا وێ ژ ھەردو یانیێن دی یێن باکوورێ کوردستانێ د خولا پلا سێ دا باشترە ئەوا شیایی سەرکەفتنەکا گرنگ ل دەرڤەی یاریگەھا خوە ل سەر تیما تەکیروڤا سپور تۆمار بکەت ب سێ گولان بێ بەرامبەر و پێشڤە ھاتە رێزا پێنجێ ب 17 خالان کێمتر یاریەکێ ژ تیمێن دی.
ژ یاریێن خولا بالگی لیگ بوو دەربازبوونێ بوو خولا پلا سێ تیما جزیرە سپور بەردەوامی دا ئەنجامێن خوە یێن سەرکەفتی ل وەرزێ ئەڤ سالە پشتی د یاریا خوە یا ڤێ حەفتیێ دا شیای سەرکەفتنێ ل سەر حەسکیف سپور تۆمار بکەت ب پێنج گولان بێ بەرامبەر کو دبیتە سەرکەفتنا پێنجێ ل دووڤ ئێک تیما جزیرە سپور تۆمار دکەت.