ھەولێر بۆ قارەمانا کوردستانێ
ئەڤرۆ نیوز، زنار:
د رێورەسمەکێ تایبەت دا ل یاریگەھا فرەنسو حەریری ھەڤرکیێن خولا ھەرێما کوردستانێ یا تەپا پێ ٢٠١٥_٢٠١٦ ب دوماھی ھات و تێدا یانا ھەولێر شیا ناسناڤێ خولا ھەرێما کوردستانێ مسوگەر بکەت پشتی ئەڤ قوناغە وەک سەرکێشا کومێ ب دوماھی ئینا دەمێ ب دو گۆلان بەرامبەر گۆلەکێ سەرکەفتن ل سەر یانا پێشمەرگەیا ھەولێر تومارکری و یانا دھۆک ژی ل رێزا سیێ ھات و زاخۆ ژی ل رێزا چارێ پشتی ئەو ژی ل یاریگەھا دھۆک یا وەرزشی بێ گۆل وەکھەڤ بوین.
د یاریا ئێکێ ناڤبەرا یانا ھەولێر و پێشمەرگە یا ھەولێر دا ھاتیە کرن د ڤێ یاریێ دا و نیڤا ئێکێ یانا ھەولێر باشتر یاری دکر و شیان سێ دەلیڤەیێن مسوگەر ل سەر گۆلا پێشمەرگە ھەولێر پەیدابکەن لێ چو ژ ڤان دەلیڤەیان مفا ژێ نە ھاتە وەرگرتن بەرامبەر یاریکەرێن پێشمەرگە زێدەتر یاری ل نیڤا یاریگەھێ دکر و چو دەلیڤەیێن مەترسیدار پەیدانەکرن ل سەر یانا ھەولێر و نیڤا ئێکێ بێ گۆل بۆ ھەردو تیمان ب دوماھی ھات.
د نیڤا دویێ دا راھێنەرێ یانا ھەولێر یوسف کاکی باشتر خواندنا یاریێ کربوو و شێوازێ یاریا یانا خوە گوھارت و د دەسپێکا نیڤا دویێ دا یاریکەرێن ھەولێر شیان ھێرشێن مەترسیدار ل سەر گۆلا پێشمەرگەیا ھەولێر پەیدابکەن و ل دەقیقەیا ٥٢ ژ یاریێ یاریکەرێ خودان شیان و گۆلکەرێ خولا ھەرێمێ یێ یانا ھەولێر فەرحان شوکر شیا گۆلەکێ بۆ یانا خوە توماربکەت، پشتی ڤێ گۆلێ یاریکەرێن پێشمەرگا ھەولێر فشارەکا مەزن ل سەر گۆلا ھەولێر پەیداکر بۆ راستڤەکرنا ئەنجامێ یاریێ و راھێنەرێ یانا پێشمەگا ھەولێر سەمیر بابو چەندین گوھۆرین کرن بۆ تومارکرنا گۆلەکێ بەرامبەر یاریکەرێن ھەولێر تنێ پشتبەستن ل سەر ھێرشێن ھەڤدژ دکر بۆ پشتراستکرنا ئەنجامێ یاریێ لێ ژ ئەنجامێ فشارا بەردەواما پێشمەرگا ھەولێر ل دەقیقەیا ٨٠ عبدولا عەلی شیا ب سەری گۆلا وەکھەڤیێ توماربکەت و پشتی ڤێ گۆلێ یاریکەرێن ھەولێر جارەکا دی دەست ب رێکخستنا ھێرشان کر بۆ تومارکرنا گۆلا دویێ و سەرکەفتنێ و د ئەنجامێ فاولەکێ دا نەدیم کەریم شیا ل دەقیقەیا ٩١ ژ یاریێ بۆ یانا ھەولێرێ توماربکەت و سێ خالێن یاریێ یێن زێرین و ناسناڤێ خولێ بۆ یانا خوە مسوگەر بکەت و پشتی ڤێ گۆلێ یاری ب سەرکەفتنا یانا ھەولێر ب دو گۆلان بەرامبەر گۆلەکێ ب دوماھی ھات ب ڤی ئەنجامی یانا ھەولێر شیا ناسناڤێ خولا ھەرێما کوردستانێ مسوگەر بکەت دەمێ قوناغا چارگوشا زێرین ل رێزا ئێکێ ب یازدە خالان د بەرژەوەندیا خوە دا ب دوماھی ئینای و ناسناڤێ خولێ بۆ یانا ھەولێر ما.
د یاریەکا دی دا ل یاریگەھا دھۆک ھەردو نوونەرێن پارێزگەھێ یانا دھۆک و زاخۆ بێ گۆل وەکھەڤ بون و ب ڤی ئەنجامی یانا دھۆک ل رێزا سیێ جھێ خوە پارسات ب شەش خالان و زاخۆ ب پێنج خالان رێزا چارێ و دوماھیێ یا قوناغا چارگوشا زێرین.
