ھەکە مالا تە ل کوردستانێ بیت شەھیانا خوە ل زڤستانێ نەکە
ئه‌ڤرۆ:
ھندەک حەز دکەن ل وەرزێ زڤستانێ شەھیانا خوە بکەن چونکو سەقایەکێ رۆمانسی و ئەڤینیێ یە، بەلێ تو دزانی دێ چەند نەخۆشیان بینی دەمێ تو ل زڤستانێ شەھیانا خوە بکەی؟
باران: چو پێنەڤێت سەقا نەیێ دابینکریە ل زڤستانێ، ھەر کاڤەکێ دبیت باران بھێت و بێی ھۆشداری، لەورا ھەکە تە بڤێت شەھیانا خوە ل زڤستانێ بکەی دڤێت بەردەوام گوھێ تە ل نووچێن سەقای بیت ھەتا رۆژا شەھیانێ و چو پێنەڤێت ژی تو نەشێی ل جھەکێ ڤەکری شەھیانا خوە بکەی.
گول: گەلەک گول ھەنە ل وەرزێ زڤستانێ دوەریێن و دبیت مێزا ل بەرسینگێ بووک و زاڤان یا ڤالا بیت ژ گولان، لەورا پێدڤیە تو پرسیارا ئەندازیارەکێ چاندنێ بکەی کا کیش گول ل زڤستانێ ھەنە دا مێزا خوە پێ بخەملینی یان ھەر چو نەبیت دەستکەکێ گولان د دەستێن بووکێ دا بیت بۆ جوانیێ.
گەرماتیا پێدڤی: دڤێت تو خوە ژ گەرماتیا جھێ شەھیانێ پشتراست بکەی و دڤێت ڤەخوارنێن کەل بۆ مێڤانان بینی.
وێنێن شەھیانێ: تو نەشێی وێنێن جودا جودا بۆ خوە و بووکێ بگری ل ناڤ جھێن جودا وەکو پارک و جھێن سرۆشتی، دێ مینیە د ھۆلێ ڤە ژ ترسا بەفر و بارانان.
ھژمارەکا کێم یا مێڤانان: ژبەر سروشتێ سەقای ھندەک ناھێنە شەھیانێ، لەورا باش ھزرا خوە بکە و پاشی شەھیانا خوە ل زڤستانێ بکە.
یا ژ ھەموویێ خرابتر ھەکە مالا تە ل کوردستانێ بیت دڤێت تو ھزرا کارەبێ بکەی چونکو گاز یا کێمە و خەلک ھەموو یێ ل ھیڤیا ھیتەرێن کارەبێ و سپلێتان بۆ گەرمکرنا مالێ و ئەڤە دێ بیتە ئەگەر کارەب یا کێم بیت و چو پێنەڤێت سپێدێ ئاڤ دێ یا سار بیت و سەرشووشتن نابیت و ئەڤە نڤێژا تە یا سپێدی چوو و یا نیڤرۆ ژی خودێ دزانیت.
