یاریکەرەکێ باژێرێ زاخۆ ئەڤرۆ دێ بەر ب قارەمانیا ئاسیا ڤە چیت
ئەڤرۆ، ھشیار دوبانکی:
قارەمانێ عیراقێ و رۆژئاڤا ئاسیا ب یاریا رومی و کورێ پارێزگەھا دھۆکێ یونس موحسن بریارە ئەڤرۆ بەر ب وەلاتێ ڤیتنامێ ڤە بچیت ب مەرەما پشکداری کرنێ د قارەمانیا ئاسیا دا ل سەر ئاستێ لاوان ل گەل ھەلبژارتیێ عیراقێ.
یونس موحسن کو خەلکێ باژێرێ زاخۆ یە د دیدارەکێ دا بۆ رۆژناما ئەڤرۆ گوت: ماوەکە خوە بەرھەڤدکەم ل یاریگەھا بنگەھێ لاوان ل زاخۆ کو کارتێکرن ل سەر من کریە ئەردێ ڤێ یاریگەھێ ژبەرکو لاوازە گەلەک و توشی ماندی بوونەکێ بوویمە لێ سەرارای نەبوونا یاریگەھێ من باوەریەکا مەزن ب شیانێن خوە راھێنەرێ خوە ھەیە دێ شێم ب ئەنجامەکێ سەرکەفتی ژ قارەمانیا ئاسیا ڤەگەرم، ژبەر نەبوونا یاریگەھێ ئەز نەچار بووم چەند رۆژا راھێنانێن خوە بەمە یاریگەھا سێمێلی سوپاسیا کارگێریا یانا سێمێل کەین بۆ دانا یاریگەھێ کو یانا زاخۆ یاریگەھا خوە یا فریزەی نەدا من ژبەرکو دیارکر دێ فریزەیێ یاریگەھێ خراپ بیت.
یونس موحسن د قارەمانیا رۆژئاڤا ئاسیا دا شیابوو ٦٤.٨٠ م رێزا ئێکێ ب دەستخوڤە بینت زێدەتر ناڤبری گوت: دێ بزاڤێ کەم د قارەمانیا ئاسیا دا ل وەلاتێ ڤێتنام نەمرەکا باشتر توماربکەم و خوە نێزیکی قارەمانێ جیھانێ بکەم کو دناڤبەرا من و قارەمانێ جیھانێ دا ٣ مەتر بتنێ ماینە و ئەگەر ل ماوێ بھێت پشتەڤانی و چاڤدان بۆ من ھەبیت دێ شێم نەمرێن مەزنتر ل سەر ئاستێ جیھانێ و ئاسیا تومارکەم .
ناڤبری زێدەتر دیارکر ھەتا نوکە چو یانا خوە ل من نەکریە خودان و یانا زاخۆ پشتەڤانیا خوە ھەتانوکە بومن نەدیارکری یە .