یانەیا ئافرەتێن دهۆكێ گەشبینە ب پشكدارییەكا سەرفەراز و بدەستڤە ئینانا دەستكەڤتەكی
د داخویانیەكێ دا سەرۆكا لژنەیا ئافرەتان ل فدراسیۆنا فوتبۆلا ئیراقێ بڕیار هاتە دان ب دەستپێكرنا وەرزێ نوو یا خولا ستێرێن ئیراقێ ل سەر ئاستێ كچان كو بڕیارە ل دەستپێكا كانوونا ئێكێ یا بهێت ب شێوەیێ دو كۆم سیستەمێ خول بهێتە كرن و هەتا نوكە دەهـ یانە ب فەرمی پشكدارن و یانەیا ئافرەتێن دهۆكێ تاكە یانەیا پارێزگەهێ دێ‌َ پشكداربیت.
زێدەتر سابرین حامد گۆت: كۆمبوونەكا بەرفرەهـ یا ڕێكخەری بۆ ئەوا یانەیێن بەرهەڤیا خوە دیاركری ژبۆ پشكداریێ د وەرزێ نوو یا خولا ستێرێن ئیراقێ دا كریە، تێدا چەندین بابەت هاتنە بەحسكرن و بڕیار هاتنە دان، ژ وانا ژڤانێ وەرزێ نوو یا خولێ دێ ل چاری كانوونا ئێكێ یا بهێت بیت، نوونەرێن دەهـ یانەیان پشكداری كۆمبوونێ كربوون ئانكو ئەو دێ پشكداربن، شێوازێ ئەنجامدانا خولێ دێ ل سەر دو كۆمان هێتە بەلاڤكرن، كۆما ئێكێ یا دەڤەرا باكۆرێ ئیراقێ و كوردستانێ یە، كوما دویێ دێ دەڤەڕا ناڤەڕاست بیت، سەركەفتیێن ئێكێ و دویێ یێن هەر كۆمەكێ ئێكسەر دێ دەربازبنە قووناغا چارگۆشەیا زێڕین، دووڤدا دێ یاریێن ڤێ قووناغێ ب شێوەیێ كۆمڤەبوون ل باژێرەكی هێنە كرن.
ژلایەكێ دووڤە ناڤهاتی دیاركر بۆ وەرزێ نوو دێ كۆپا ئیراقێ ژی هێتە ئەنجامدان و ژڤانێ وێ دبیت بچیتە مەها شووباتا سالا بهێت و گۆت: هەرچەندە پێشتر هاتبوو پێشنیاركرن خول ل ناڤەڕاستا مەها بهێت و كۆپا ل كانوونا ئێكێ یا بهێت دانابوو، لێ ژبەر داخوازییا یانەیێن پشكدار ژبۆ خۆ بەرهەڤكرنەكا باشتر مە پاشئێخست، بۆ مە گرنگ زێدەتر یانە پشكداربن لەوما ئەڤ بڕیارە هاتە دان.
ژلایێ خوەڤە ئەنیس خالد سەرپەرشتێ تیما ئافرەتێن دهۆكێ گۆت: بۆ ماوەیێ مەهەكە تیما مە بەرهەڤییان دكەت ب سەرپەرشتیا ڕاهێنەر ئاراز سالح، مە سێ یاریزانێن پیشەكاریێن وەلاتێ ئیرانێ ئیناینە، هەروەسان چار یاریزان ژ دەرڤەیی پارێزگەهێ هاتینە دناڤ ڕێزێن تیمێ دا، پشتی ڤێ بڕیارا فدراسیۆنێ دێ پلان و بەرنامەیێن مە هێنە گوهۆڕین كو باشتر ب گۆنجیت و پشكداریەكا سەرفەراز بكەین، سپاسیا پارێزگارێ دهۆكێ بەرێز د. عەلی تەتەری دكەین بۆ ئەوێ پشتەڤانییا بەردەوام ل یانەیێ دهێتە كرن، هیڤییا مە ئەوە نوونەرێن سەرفەرازبین یێن پارێزگەهێ.