گەڕیانەک ل پەناگەهێن دوهیبوونێ
خورشید تەوفیق باکۆزی
د ناڤ پەڕاسویێن دوهیبوونێ و
دناڤ خرناقە و
د ناڤ گێلەشۆکا دوهی دا
من دوهییەک دیت
چاڤێ وێ ل عەرشێ خودێ بوو
جانێ وێ ل بەختێ ئاگری..
من دوهییەک دیت
کەڤلێ وێ جهۆرێ هەسپێن شەڤێ بوو
ئەڤە ژمێژە داخێن دەمی
خەونا وێ یا بنگۆڕ کری..
من دوهییەک دیت
یا ژ ئەڤرۆ یا مە تووڕە یە و
یا پرچا ڕۆژێ دڤەچڕیت
دەمێ دبینیت؛
سینگ و بەر و بەدەنێ وێ و ئەڤرۆ یا مە و
خوهـ و خوینا جانگۆرییان
یا ل سەر ناڤێ عەجاجەکێ بیابانێ و
دێوێن بەڕیێ و
حوکێ شەڤا شەڤ خڕیانێ تاپۆکری
لەورا هەردەم لێ هاوارە
کەلەگڕی یا دسینگێ وێ دا گەرم و هارە..
دەمێ دبینیت؛
کەڤلێ وێ همبانکا بایە
سویارێ هەسپێ درەوا
ل ئەنیا ڕۆژێ یێ سویارە و
ل ئەنیا ڕۆژێ کەدخودایە..
دەمێ دبینیت؛
ل پاخلا خەوێ
ڕاستی تەڕمەکێ مرارە و
ئەڤە ژمێژە
ل پاخلا خەوێ
یا بەرگۆڕە و یا ل داردایە..
ل پەناگەهێن دوهی گەڕیام
ل بەرکێلەکا زنارەکێ بەرز و بلند
من کەڤڕەک دیت
ل سەر ئەنیا وی نڤیسی بوو
گەڕیان ل ڤێرە قەغەیە
ئەڤراز نەچە یا مینڕێژە و تەهلیکەیە
من دارەکا دینداری دیت
قوڕمکەک مابوو
ئەوژی بارۆڤا ئاگری د سینگی دابوو
هزرەتا وێ خەمل و سیبەر و کاتەیە
خەمل و سیبەر و کاتەیە..