10 هەلبەستێن ئەحمەدێ مەتەری
وەرگێڕان: حەسەنێ سلێڤانەیی
مرۆڤێ کێرهاتی
ب ناڤێ والیێ مە یێ رێزدار
بریار دان ، ب سیدارەدانا ئەوێ برایێ من کوشتی.
لێ ئەو کورت بوو
جەلادی دپرسی:
سەرێ وی ناگەهت وەریسی
پا ئەز دێ چ بکم؟
پشتی هزرکرنەکا کوور
والی فەرمان ب سیدارەدانا من دا پێش ویڤە
چونکو ئەز ژ وی درێژتر بووم.
**
ب کورتی
چو متمانە دناڤ خەلکێ دا نینە
خەلکێ چو متمانە نینە
نیڤا وان مینا پولیسان
ل جەم دەستهەلاتداری کاردکن ئو نیڤا دی تومەتبارن.
**
بەرامبەر شوورهان
دو ئیحتیمال ل بەر هەلبەستڤانێ ئازاد هەنە
ئەگەر خوە ل شوورها بێدەنگی یێ دا
دو ئیحتیمال:
یان دڤێت بمرت
یان دێ مرت!
**
سەئەت
ئورتەکا تەنگە و
فرارەکێ تومەتبارە
ل پێشیا وی و ل پشت وی
سیخور دبەزن
ئەها ئەڤەیە زەمان.
**
خەلق
دو مەخلوق ل سەر ئەردی هەنە :
مرۆڤ و ئەمریکان .
***
کوڕک
سەرۆکێ مە بچووک بوو وهندابوو
دەیکا وی ب خەم کەت و
ب بێ هوشی بەزی ل هەمی وەلاتی لێبگەڕت
کۆتنێ: خەما نەخوە
هندانابت هەتا ئەبەد
ئەگەر ئەڤ بەرزەبوویێ تە قەنجە و
کوڕێ تە یێ حەلالە،
هەردێ بینت کەسەک
قیرکر:
نەهەرێ .. کوڕک هندابوو!
**
ئەرکێ قەلەمی
من قەلەمەک تژی هەیە
ل دەفتەرەکێ دگەڕت
دەفتەر ل هەلبەستەکێ دگەڕت
ئو هەلبەست د وژدانا من دا ڤەشارتیە
ئو وژدانا من ل تەناهیێ دگەڕت
ئو تەناهی ل قشلێ ئاکنجی یە و
قشلە ل قەلەمەکێ دگەڕت
من قەلەمەک هەیە
هەی سەیۆ دێ ل سەر کۆنوسی ئیمزا بکە.
**
تەڕم
د تەنەکا گلێشی دا
من تەڕەمەک ب سیمایێن عەرەبۆشکا دیت
هەلۆ و مێش ل دوور کۆم ب بوون
نیشانەک د سەردا بوو دگۆت:
ئەڤە تەڕمەکە بەرێ دگۆتنێ کەرامە.
**
کابووس
کابووس ل بەرامبەر من ژپێرڤەیە
ڕابە ژ خەوا خوە
ئەز نە نڤستی مە
پا ڤێجە ئەڤە نە کابووسە
لێ تو یێ ناڤچاڤێن دەستهەلاتداری دبینی.
**
خەون
ل بەر دەستێن خوێڤزانکی راوەستیام
من گۆتێ: ئەزبەنی دخەونێ دا من ددیت
ئەزێ وەک مرۆڤان دژیم
ئو ل دەوروبەرێن من مرۆڤن و
دەنگێ من د دەڤێ من دایە و زاد د دەستێ من دایە و
ئەزێ دچم و کەس ل دویڤ من نینە
ب ترس قیژی ل من ڤەدا:
کوڕێ من حەرامە
تە تڕانە ب قەدەرێ کری یە
کوڕێ من بنڤە دەما تۆ دنڤی
ئو بەری وی بهێلم
تلیێن رژێمێ ژ کوهێن من دەردکەتن و
سەرێ من هەژیا و پەقی.
