100خێزانێن ئێزدیێن عفرینێ ئاواره‌ى هه‌رێما كوردستانێ دبن
ئه‌ڤرۆنیوز، ئه‌میر ئه‌ترووشى:
ژبه‌ر هێرشا سوپایێ توركیا و گرۆپێن رادیكال بۆ سه‌ر باژێرێ عه‌فرینێ ل وه‌لاتێ سووریا، نێزیكی (100) خێزانێن ئێزدیێن عه‌فرینێ ملك و مال ل پشت خۆ هێلان و ئاواره‌ی هه‌رێما كوردستانێ بووینه.
كاوه عیدۆ، به‌رپرسێ رێكخراوا جڤین بۆ گه‌شه‌پێدانا جڤاكی ل پارێزگه‌ها دهۆكێ بۆ (ئه‌ڤرۆ نیوز) راگه‌هاند، ئه‌ڤ خێزانێن ئێزدی ژ باژێرێ عفرینێ ئاواره‌ی هه‌رێما كوردستانێ بووین و ملك و مال ل پشت خۆ هێلان و هاتنه تالانكرن ژلایێ گرۆپێن رادیكال ڤه و ل پارێزگه‌هێن دهۆكێ و هه‌ولێرێ و سلێمانیێ ئاكنجی بووینه، پتریا وان ل خانیێن ب كرێ دانه و د ره‌وشه‌كا سه‌خت و دژوار دا دژین، ژ به‌ر كو بارێ وان یێ ئابووری لاوازه و بێكارن و ده‌لیڤێن كاری بده‌ست وان ناكه‌ڤن و ئه‌و ل هڤیا به‌رنامێ رێكخراوێن نێڤده‌وله‌تی یێ دووباره ئاكنجیكرنێ یێ (UNHCR) بۆ چه‌ند وه‌لاتێن ده‌رڤه بوون، لێ نهۆ ئه‌و به‌رنامه ژی هاتیه راگرتن.
كاوه عیدۆ دووپاتكر ژی، ئه‌ڤ خێزانه پێدڤی ب هه‌موو جۆرێن هاریكاریانه و ئه‌و شیانێن مادی نینن هه‌موو پێدڤیێن خۆ دابین بكه‌ن، داخوازێ ژ رێكخراوێن نێڤده‌وله‌تی و ناڤخۆیی و ده‌زگه‌هێن ئێزدیان ب تایبه‌تی دكه‌ین گرنگیێ بده‌نه ئێزدیێن عفرینێ.