11 كارگه‌هێن پیشه‌سازی ل دهۆكێ دێ هێنه دانان
ئه‌ڤرۆ:
ب سه‌رپه‌رشتیا د. عه‌لی ته‌ته‌ر، پارێزگارێ دهۆكێ و ب به‌رهه‌ڤبوونا رێڤه‌به‌ری و لایه‌نێن په‌یوه‌ندیدار دوهی رۆژا دوشه‌مبی 9/5/2022 كۆمبوونا لژنا گه‌شه‌پێدان و پشتگیریا پڕۆژه‌یێن پیشه‌سازی هاته كرن.
د كۆمبوونێ دا دانوستاندن ل دۆر پڕۆژه‌یێن پیشه‌سازی یێن سالا بۆری و قووناغێن بجهئینانا وان پڕۆژه‌یان و پڕۆژه‌یێن ئه‌ڤ ساله رازیبوون ل سه‌ر هاتیه‌دان هاته كرن، پاشی ل دۆر پڕۆژه‌یێن پێشنیاركری رازیبوون ل سه‌ر 11 پڕۆژه‌یێن كارگه‌هێن پیشه‌سازی د بیاڤێن (ڤه‌خوارنێن سروشتی، ڤه‌خوارنێن وزێ، به‌رهه‌مئینانا ئاری، چێكرن و داگرتنا شه‌ربه‌تێ، به‌رهه‌مئینان و دروینا جلكان، دروستكرنا كارتۆنان، عمبارێن ساركه‌ڕ بۆ عمباركرنا به‌رهه‌مێن چاندنێ، كارگه‌ها ساركرن و قوتوكرنا هه‌موو جۆرێن گوشتی) ل سنۆرێ ده‌ڤه‌رداریێن جودایێن پارێزگه‌ها دهۆكێ هاته‌دان.
هه‌روه‌سا د كۆمبوونێ دا باس ل ده‌ڤه‌رێن پیشه‌سازی ل سنۆرێ ده‌ڤه‌رداریێن سه‌ر ب پارێزگه‌ها دهۆكێ ڤه و چاوانیا بكارئینانا ئه‌ردێ وان ده‌ڤه‌ران بۆ پڕۆژه‌یێن پیشه‌سازی هاته كرن.
