14 ژن یێن ئیناین و ئێک ب 15 ملیۆن دینارا فرۆتە دھۆکیەکی
ئه‌ڤرۆ نيوز:
زەلامەکێ کورد ل دەڤەرا گەرمیان ھەتا نوکە 14 ژن ئیناینە و ھندی دیار 25 زارۆک ھەنە و ب رەنگەکێ گەلەکێ ھوڤانە سەرەدەریێ ل گەل زارۆیێن خوە دکەت، رێڤەبەرێ مافێن مرۆڤی ل دەڤەرا گەرمیان ژی بۆ رۆژناما ئەڤرۆ راگەھاند: زەلامەکێ دھۆکی ژنا شەشێ یا ڤی کابرایی ب پازدە ملیۆن دیناران کریە و نوکە ل پارێزگەھا دھۆکێ یە.
خەبات رەشید، رێڤەبەرێ نڤیسینگەھا مافێ مرۆڤی ل دەڤەرا گەرمیان بۆ رۆژناما ئەڤرۆ گۆت: “وەلاتیەکێ کورد ب ناڤێ (ن، ف، س) د ژیێ 57 سالیێ دا کو ب ئەسل خەلکێ قەزا کفریە، بەلێ ئاکنجیێ قەزا داقووق یا نێزیک باژێڕێ کەرکووکێ یە، ١٤ ژن ئیناینە”.
خەبان ب ڤی رەنگی چیرۆکا ڤی زەلامی ڤەدگێریت: “دەستپێکێ سێ ژن ئیناینە و ژ ھەرسێ ھەڤژینێن خوە چو زارۆ نەبووینە، ھەرسێ ھەڤژینێن خوە تەلاقداینە، پاشی ژنا چوارێ ئینایە و چوویە ژنا پێنجێ ژی ئینایە، ھەڤژینا وی یا پێنجێ ئیرانی بوویە و پێنج کچ ھەبووینە، ھەڤژینا شەشێ ئاریشەیا وی د گەل زارۆیێن وی گەھشتیە دەستێ مە وەکو مافێ مرۆڤی”.
پێڤە دچیت و دبێژیت: “زارۆیێن ڤێ ژنا نوکە ل دھۆکێ ئماژە ب وێ چەندێ کریە، ئەڤی زەلامی(ن) ل ھەڤژینا شەشێ چوار زارۆ ھەنە و ئێک کچ و سێ ژی کوڕن، رابوویە ب تەلاقدانا ھەڤژینا شەشێ و زارۆیێن خوە ژی ل گوندەکێ گەرمیان داناینە بەر کارکرنێ و گەلەک ھاتینە ئەشکەنجەدان، بۆ نموونە کارێ وان زارۆیێن بێ دایک ماین، خودانکرنا تەرش و تەوالان بوویە”.
ھەر وەکو رێڤەبەرێ مافێن مرۆڤی ئاماژە پێ کری، تاوانا ژ ھەمیێ مەزنتر ئەو بوویە، ئەف زەلام رابوویە ب تەلاقدانا ھەڤژینا خوە یا شەشێ و ژ بەر کو دایک و بابێن وێ ب ناڤ سال ڤە چوویی بووینە و کەس و کار نەبووینە، ھەر وی زەلامی پشتی تەلاقدایی، ب پازدە ملیۆن دینارێن عیراقی فرۆتیە کابرایەکێ دھۆکی، ھەر وەکو زارۆیێن ڤێ ژنێ پێزانین داینە رێڤەبەریا مافێن مرۆڤی و گۆت: “ئەم نزانین کا ئەو کەسێ ل دھۆکێ ئەڤ ژنە کری، بۆ چ مەرەم کریە، بۆ ھەڤژینیێ بوویە یان ژی ھەر کارەکێ دی، بەلێ دبێژن دەمێ دایکا مە ل گەل ڤی زەلامی چوویی، مە گەلەک کرە کری و جار جار دھات سەرە مەددا، پارە و جلگ ژی داینێ، بەلێ ب دزی بابێ وان ڤە -ھەڤژینێ وێ یێ بەرێ-. ددەنە زانین ژی کو نوکە ئەوان چو پێزانین ل سەر دایکا خوە نینن”.
خەبات گۆتژی: “بەری چەند رۆژان ب کارەکی ئەز ل ھەولێرێ بووم زانیاری گەھشتنە من کو حالەتەکێ وەسا یێ ھەیی ئێکسەر من جێگرێ خوە فڕێکر و ئەف زارۆیە گەھاندنە رێڤەبەرایەیا مافێ مرۆڤ، زۆریەکا زۆر ل ڤان زارۆیان ھاتیەکرن سێ کوڕ و کچەکن ب رەنگەکی ھاتینە ئەشکەنجەدان، ژ بەر کو ھەر ل زارۆیێ کارێ وێ دوتنا مەڕ و بزنا بوویە دو تلیێن وێ مەھینە، زارۆیەکێ دی یێ 12 سالی ھەیە ل جھێ خوە کریە زێرەڤانێ بیرا پترۆلێ ل کەرکووکێ، ئەڤی زەلامی چواردە ژن ئیناینە و ب گورەی زانیاریێن من 25 زارۆک ژی ھەنە، چونکو تنێ ل ئێک ژن 10 زارۆ ھەنە و ل قەزا کفری ماینە، بەلێ ئەڤی زەلامی تنێ نوکە دو ھەڤژین ل دەف ھەنە، نوکە ئەف زارۆیە ل جھەکێ ئەمین ھاتینە دانان و دێ ل دادگەھێ سکالایەکێ ل سەر ئەڤی زەلامی تۆمار کەین و دڤێت بھێتە گرتن، چونکو زۆری ل زارۆیێن خوە کریە و زارۆیێن وی ب خوە سەرەدانا مافێ مرۆڤی کریە، چ نەمایە ئەڤی زەلامی ب سەرێ ئەڤان زارۆیان نە ئینایی، حالەتەکێ زۆرێ سەیرە و ژبەر رێڤەچوونا کەیسا ڤەکۆلینێ ھندەک زانیاریا نەشێین بدەینە رۆژناما ئەڤرۆ”.
