2-3% ژ کچ و ژنێن پارێزگەھا دھوکێ دھێنە سونەتکرن
ئەڤرۆ نیوز ، نەوزاد ھلۆری:
ماوەیێ چوار سالایە رێکخراوەکا پارێزگەھا دھۆکێ ب شێوەیەکێ مەیدانی کار لسەر نەھێلانا سونەتکرنا کچ و ژنان ل ھەرێما کوردستانێ ب گشتی و پارێزگەھا دھۆکێ ب تایبەتی دکەت ،ل گورەی زانیاریێن ئەوێ رێکخراوێ ھێشتا ل پارێزگەھا دھوکێ ب رێژا 3-2% ژ کچ و ژنان دھێنە سونەتکرن.
دڤی واریدا “شێرزاد پیرس موسا ” سەرۆکێ رێکخراوا ئەلند بو دیموکراسیکرنا گەنجان تایبەت بو ئەڤرۆ نیوز گۆت: ( ل سالا 2014 ھەتا نھا رێکخراوا مە ب ھەڤکاری ل گەل رێکخراوا وادی یا ئەلمانی و یونسێف و کونسولگەریا ھولەندا ل ھەولێر و چەند رێکخراوەکێن دن کار دکەین ژ بوو نەھێلانا سونەتکرنا کچ و ژنان ل کوردستانێ ب گشتی و پارێزگەھا دھۆک ب تایبەتی و ھەتا نھا مە شیاینە رێژەیەکا زورا کچ و ژنان ل سونەتکرنێ دویر بگرین)
زێدەتر گۆت: (ل گورەی ئەوان راپورت و سەرەدانێن مە ب مەیدانی ئەنجامدای جوداھیەکا زور ژلایێ دەڤەران ڤە ھەیە بو سونەتکرنا کچ و ژنان لگورەی ئەو زانیاریێن کو یونسێف و ھارتلاند ھاتینە بەلاڤکرن ، و ل دوڤ ئەو کارێن کو مە سەرپەرشتی بو کرین ل ھەموو دەڤەرێن ھەرێما کوردستانێ سونەتکرنا کچ و ژنان ھەیە و رێژەیەکا زور یا ئەو ئافرەتێن کو ب ئەرکێ سونەتکرنێ رادبوون لسەر دەستی َمە کارێ خوە ھێلایە ، ھەر چەندە ل گورەی قانونا ھژمار 8 یا سالا 2008 سونەتکرنا کچ و ژنان نابیت بھێتەکرن بەلێ ئەم ب ئاشکرای دبێژین سونەتکرنا وان یا ھەیی ، ھەر بوو نموونە نھا رێژا سونەتکرنا کچ و ژنان ل پارێزگەھا دھۆکێ دگەھیتە 3-2% کو ئەڤ یەک ژی رێژەیەک زورە )
ناڤبری دیارکر ژی کو پرانیا وان کچ و ژنێن دھێنە سونەتکرن دکەڤنە گوندان و بەلێ ل باژێران ژی ھەیە و ھندەک ژ وان کچ و ژنێن کو ھاتینە سونەتکرن خودان باوەرنامەیێن بلندێن زانکو و پەیمانگەھانن و گۆت ژی: ( ئەگەرێن سەرەکیێن زوربوون و مانا سونەتکرنا وان دزڤریت بو داب و نەریتێن جڤاکی ، ھندەک ئەگەرێن ئاینی و ھندەک ژی بوو شەرمێ دزڤریت ئەگەر نەھێنە سونەتکرن ، و پرانیا ئەو کچ و ژنێن کو ھاتینە سونەتکرن ژی دناڤبەرا ژیێ پێنج سالی بو 10 سالی بووینە بەلێ ئەڤ ژییە ناکەڤنە پارێزگەھا دھوکێ)
سەرۆکێ رێکخراوا ناڤبری دیارکر ژی کو ئەوان سێ تیمێن گەروک پێکیناینە بو سەرەدانا گوند و باژێران و ھوشیارکرنا کچ و ژنان و گۆت ژی: (ھەر تیمەکا مە ژ سێ کەسان پێکدھێت کو ئەو ژی پێدڤی یە ئافرەت بیت و دەرچویێن پشکا ڤەکولەرێن جڤاکی بن و سەربوور و شارەزایی دوارێ سونەتکرنا کچ و ژنان ھەبیت ، ئەڤ تیمە ژ نێزیک و ب شێوازەکی َمەیدانی سەرەدانا ئەوان جھان دکەن کو گومان ھەیە سونەتکرنا کچ و ژنان بھێتەکرن ب تایبەتی بو گوندان کو مەرەم ژی ئەوە ھوشیاریا وەلاتیان بھێتەکرن داکو ژ روویێ جڤاکی و ساخلەمی و دەروونی و ئاینی ڤە بھێنە پاراستن ل گوەری قانونا ھژمار 8 سالا 2011)
ئەو گوندێن کو رێکخراوا ناڤبری ل بەرە ژ نێزیک سەرەدانێ بو بکەت 600 گوندن کو زێدەتری 13 ھزار کەسان ب خوڤە دگریت و شێرزادی گوت ژی: ( پێدڤی یە خزمەتگوزاریێن مینا ئاڤا پاقژ و بنگەھێن ساخلەمیێ و قوتابخانە بھێنە چێکرن ب تایبەتی بو گوندان داکو پتر بھێنە پاراستن)
دھێتە زانین کو رێکخراوا ناڤبری پشتی مەھەکا دن دی َھەموو ھورکاریێن د راپورتەکێ دا بەلاڤ کەن.