25 پرۆژێن ب خودانکرنا پەلەوەران ل شێخان ھاتینە داخستن
ئەڤرۆ نیوز، بارزان مززوری:
بەرپرسێ بنگەھێ ڤیتەرنەری ل ناحیا قەسرۆکێ بۆ ئەڤرۆ نیوز دیار کر کو 50 پرۆژێن ب خودانکرنا پەلەوەران ل قەزا شێخان ب شێوەکێ فەرمی ھاتبوونە دانان، لێ نوکە 25 ژ وان پرۆژان ژ بەر داکەفتنا بھایێ کیلۆیا مریشکان ھاتینە داخستن.
د. عیماد مستەفا، بەرپرسێ بنگەھێ ڤیتەرنەری ل ناحیا قەسرۆکێ ئاشکرا کر کو بھایێ کیلۆیا مریشکان ل سەر خودانێ پرۆژەی گەھشتیە ھزار و 900 دیناران و ھەر کیلۆیەکا مریشکێ ب دو ھزار دیناران رادوەستیت
ب ڤی شێوەی خودانێن وان پرۆژان ب کوژمەکێ مەزن یێ پارەی خوسارەت دبن ب تایبەت د وەرزێ زڤستانێ دا، ژ بەر کو بۆ دەمێ 24 دەمژمێران ئامیرێن گەرمکرنێ ب غازێ کاردکەن و گۆت: “ھەکە بھایێ کیلۆیا مریشکێ ھەر ب ڤی شێوەیی بیت رەنگە شەش پرۆژێن دی ژی یێن ب خودانکرنا پەلەوەران ل شێخان بھێنە داخستن”.
ناڤھاتی ئاماژە دا وێ چەندێ کو ل وان ھەموو پرۆژێن پەلەوەرا یێن دەرگەھێن وان ڤەکری د دەمێ 40 رۆژان دا پتری 100 تەنێن مریشکا بەرھەم دئینن و بۆ ھەموو باژێرێن ھەرێما کوردستانێ دھێنە رەوانەکرن و گۆت: “ھەکە کاودانان د خوەش بن ئەڤ مریشکە بۆ ناڤەراستا عیراقێ ژی دھێنە رەوانەکرن”.
ل دوووماھیێ بەرپرسێ بنگەھێ ڤیتەرنەری ل ناحیا قەسرۆکێ خویا کر کو نوکە کارگەھەکەکا مەزن یا سەرژێکرنا مریشکان ل شێخان ھاتیە ڤەکرن و د دەمژمێرەکێ دا شیانێن سەرژێکرنا سێ ھزار مریشکان ھەنە و گۆت: “نوکە ئەڤ کارگەھە د قووناغا تێستێ دایە”.
