756 كانێن ئاڤێ ل ده‌ڤه‌را بارزان زاينه
ئه‌ڤرۆ نیوز، نه‌وزاد هلۆرى:
ده‌ڤه‌را بارزان ئێكه ژ ده‌ڤه‌رێن چیایى، ژ ئه‌گه‌رێ بارانێن زۆر هژماره‌كا مه‌زن ژ كانیێن ئاڤێ زاینه و ژێده‌رێن ئاڤێ زۆر بووینه، رێڤه‌به‌ریا چاندنا مێرگه‌سوورێ ژى دیاركر كو هه‌تا نوكه ل ده‌ڤه‌را بارزان دو هزار و 365ملم بارانێ بارینه.
محه‌مه‌د مێرگه‌سوورى، رێڤه‌به‌رێ چاندنا مێرگه‌سوور بۆ ئه‌ڤرۆ نیوز گۆت: (ده‌ڤه‌را بارزان پرانیا وێ ده‌ڤه‌ره‌كا چیایى یه و رێژه‌یه‌كا زور یا باران و به‌فرێ لێ دباریت، ژ ئه‌گه‌رێ باران و به‌فرێ هژماره‌كا زۆر یا كانیێن ئاڤێ زاینه و بڤێ یه‌كێ ژێده‌رێن ئاڤێ یێن نوو ل ده‌ڤه‌رێ په‌یدا بوینه).
زێده‌تر گۆت: (ل سنوورێ ده‌ڤه‌را بارزان ئه‌ڤ ساله 756 كانیێن ئاڤێ زاینه كو هنده‌ك ژ وان كانیێن نوێ نه و پێشتر نه‌بوینه، ده‌ڤه‌ر هه‌موو بویه كانى و ئاڤ و بڤى ره‌نگى دێ ژێده‌رێن ئاڤێ زور بن و ده‌ڤه‌ر ژ هشكه‌سالیێ رزگار بیت و چاندن ژى باش بیت”
مێرگه‌سوورى دیاركر ژى كو ئه‌ڤه 20 ساله وه‌كو ئه‌ڤ ساله ل سنوورێ ده‌ڤه‌را بارزان وه‌كو ئه‌ڤ ساله به‌فر و باران نه‌بارینه و زێده‌تر گۆت: (به‌شه‌ك ژ كانیێن ده‌ڤه‌را بارزان بو چاندنێ و ڤه‌خوارنێ دهێنه بكارئینان و به‌شه‌ك ژى به‌لاش دچن و ناهێنه بكارئینان).
ب گوره‌ى داتایێن چاندنا مێرگه‌سوور هه‌تا روژا 11-4-2019 ل سنوورێ ده‌ڤه‌را بارزان دوو هزار و 365 ملم بارانێ بارى بوون، سالا بوورى هه‌تا هه‌مان روژ تنێ 949 ملم بارانێ بارى بوون.