9 جه‌نه‌رالێن ئیرانێ ل شه‌ڕێ سووریێ یێن هاتینه كوشتن
ئه‌ڤرۆنیۆز، ئه‌یاد به‌رواری
هژمارا ئه‌فسه‌رێن ئیرانی یێن پله بلند ئه‌وێن د شه‌ڕی سووریێ هاتینه كوشتن ژ 2013 و هه‌تا نوكه كو ته‌هرانێ دانپێدان ب كوشتنا وان كری، یێن گه‌هشتینه 9 جه‌نه‌رالان.
ل دووڤ هنده‌ك ده‌زگه‌هێن راگه‌هاندنێ یێن فه‌رمی و نیڤ فه‌رمی، ئه‌فسه‌رێن پله بلندێن ئیرانی ئه‌وێن د شه‌ڕێ سووریێ هاتینه كوشتن د زێده‌بوونێ دایه.
ئه‌و ده‌زگه‌هێن راگه‌هاندنێ و راگه‌هاندنا ئوپۆزسیۆنا سووری ژی ئاماژێ دده‌نه زیانێن ئیرانێ ل چه‌ند مه‌هێن بۆری ل سووریێ یێن گه‌هشتینه 500 سه‌ربازان كو 30 ژ وان فه‌رماندێن پله بلندن.
ئیران ب فه‌رمی ره‌ت دكه‌ت هێزێن وێ پشكداریێ ل گه‌ل له‌شكرێ سووری دكه‌ن د شه‌ڕێ دژی ئه‌پۆزسیۆنا چه‌كدار، ئاماژێ ژی دده‌ته ئیرانیێن د وی شه‌ڕی دا دهێنه كوشتن ب (خوه‌به‌خش) و كوشتیێن زێره‌ڤانێن شۆرشا ئیرانی ی ب (خانه‌نشین یان شیره‌تكار) ناڤ دبه‌ت.
ده‌زگه‌هێن راگه‌هاندنێ یێن ئیرانی د مه‌ها چریا دویێ/ نوڤێمبه‌را 2015 ێ، كوشتنا هه‌ردو ئه‌فسه‌رێن زێره‌ڤانێن شورشا ئیرانی (عزه‌توللا سلێمانی و سه‌ید سه‌جاد حسێنی) د شه‌ڕێ سووریێ دا راگه‌هاندبوو، دیسا فه‌رماندێ كه‌تیبا (ئیمام حوسه‌ین) یا ب سه‌ر زێروڤانێن شورشا ئیرانی ڤه د شه‌ڕه‌كی دا ل گه‌ل داعشێ ل حه‌له‌ب ل باكوورێ سووریێ هاتبوو كوشتن.
دیسا ل ده‌مێن بۆری، زێره‌ڤانێن شورشا ئیرانی د به‌یاننامه‌كێ دا، كوشتنا (موسلم خیزاب) ئێك ژ فه‌رماندێن كه‌تیبا (ئیمام حوسه‌ین) د شه‌ڕێ سووریێ دا راگه‌هاندبوو.
حسێن هه‌مه‌دانی هاریكارێ فه‌رماندێ فه‌یله‌قا قودسێ یا سه‌ر ب زێره‌ڤانێن شورشا ئیرانی (قاسم سلێمانی) ئێك ژ فه‌رماندێن ئیرانی بوو ئه‌وێن ل سووریێ هاتینه كوشتن، كو ناڤبری ل رۆژا 9 چریا ئێكێ/ ئوكتوبه‌را 2015 ێ هاتبوو كوشتن، دیسا هه‌ردو جه‌نه‌رالێن ئیرانی (حاج حه‌مید موختار به‌ند و فه‌رشاد حه‌سونی زاده) ل چریا ئێكێ 2015 ێ هاتبوونه كوشتن و ب وێ چه‌ندێ هژمارا جه‌نه‌رالێن ئیرانی یێن د شه‌ڕێ سووریێ دا هاتینه كوشتن گه‌هشتنه 9 جه‌نه‌رالان.