پێنگاڤه‌كا ئومێد به‌خش بوو
ره‌وان نهێلى
پشتى 16 ئوكتوبه‌رێ قوناغه‌ك هاته پێش، كو ژ ئالیێ سیاسى و ئابوورى ڤه گوهۆرین ل سه‌ر ره‌وشا هه‌رێما كوردستانێ دا هاتن، كوردان نه‌فتا كه‌ركووكێ ژ ده‌ست دا كو داهاته‌كێ مه‌زن بوو بۆ به‌لاڤكرنا مووچێن فه‌رمانبه‌رێن هه‌رێمێ، هه‌روه‌سا گۆڕان و كۆمه‌لێ خوه ژ حوكمه‌تێ ڤه‌كێشان و ب ڤێ ڤه‌كێشانێ، بارێ حوكمه‌تێ گرانتر لێ هات، ژبه‌ر كو ئه‌گه‌ر حوكمه‌تا هه‌رێمێ چه‌ند پێدڤى ب پشته‌ڤانیا نێڤده‌وله‌تى بیت، ئه‌گه‌ر ژ ئالیێ ناڤخویى ڤه پشته‌ڤانى لێ نه‌هێته كرن و ئه‌م د ئێكگرتى نه‌بین، ره‌نگه هند گرنگیا خوه نه‌بیت.
فشارێن سه‌ر هه‌رێما كوردستانێ ژ ئالیێ به‌غدا ڤه، رۆژ بۆ رۆژێ د زێده‌بوونێ دانه، باشترین گروڤه ژى درێژكرنا راگرتنا گه‌شتێن نێڤده‌وله‌تى یێن هه‌ولێر و سلێمانیێ و هه‌روه‌سا درێژبوونا ماوێ ڤه‌نه‌كرنا ده‌رگه‌هێ حاجى ئومه‌ران و ده‌رگه‌هێن دى یێن سنورى ل گه‌ل ئیرانێ كو گه‌له‌ك كارتێكرن ل داهاتێ ناڤخو یێ هه‌رێمێ كریه و گه‌هشته وى ئاستى كو حوكمه‌ت ب نه‌چارى په‌نایێ ببه‌ته به‌ر پاشكه‌وتكرنا مووچێ پله‌دارێن پێشمه‌رگه‌ى و هه‌روه‌سا پاشكه‌وتككرنا مووچێ ده‌زگه‌هێن ئێمناهیێ.
بۆ ده‌ربازكرنا ڤێ قوناغا دارایى یا دژوار، باشترین ده‌لیڤه ئه‌وه كو حوكمه‌ت ده‌ست ب چاكسازیێن جودا جودا بكه‌ت ب تایبه‌ت ژ ئالیێ خانه‌نشینكرن و ده‌رمالان دا و پرۆژێ ڤێ دووماهیێ یێ حوكمه‌تا هه‌رێما كوردستانێ په‌سه‌ند كرى و بۆ په‌رله‌مانى هنارتى ئێك ژ پرۆژێن گرنگه كو ئێدى ژ ئه‌ڤرۆ وێڤه ژى هه‌رێم بكه‌ڤیته سه‌ر سیسته‌مه‌كێ دورست یێ دادپه‌روه‌ریا د سیسته‌مێ مووچان دا، سه‌ره‌راى ئه‌و نه‌دادپه‌روه‌یا د ماوێ 26 سالێن بوورى دا دروست بووى.
ئه‌ڤ پرۆژێ چاكسازیێ بكه‌ڤیته د بوارێ بجهئینانێ دا دێ ب سه‌دان ملیار دیناران بۆ حوكمه‌تێ ڤه‌گه‌رنه‌ڤه و بیته ئه‌گه‌ر كو بارێ حوكمه‌تێ سڤك تر لێ بهێت، ژبه‌ر كو هه‌تا ب ده‌هان په‌رله‌مانتارێن خولا نوكه یا په‌رله‌مانى ل دووڤ ڤى پرۆژه‌ى ناهێنه خانه‌نشین كرن كو پێنگاڤه‌كا باشه بۆ دادپه‌روه‌یا جڤاكى.
ل دوماهیێ هیڤیخوازین په‌رله‌مان و حوكمه‌ت هه‌درو پێكڤه هه‌موو بزاڤێن خوه بكه‌نه ئێك بۆ ده‌ربازكرنا هه‌رێما كوردستانێ ژ ڤێ قوناغا دژوار، ژبه‌ر كو ره‌وشا وه‌لاتیان ژ ئالیێ دارایى ڤه گه‌له‌ك لاواز بوویه و پێدڤى ب هندێ یه كو ئه‌ڤ ره‌وشه زێده‌تر ل سه‌ر گران نه‌بیت و هیڤیخوازین هه‌لبژارتنێن ل پێشیا مه ژى ببته ئه‌گه‌ر كو ل هه‌رێمێ ئێكگرتنه‌كا نیشتمانى په‌یدا ببیت و ئه‌ڤ دووراتیا ناڤبه‌را حزبێن كوردستانى نه‌مینیت و هه‌موو لایه‌ن ب مه‌ره‌ما ژناڤبرنا پیلانێن دوژمنان و پاراستنا به‌رژه‌وه‌ندیێن وه‌لاتیان و ئه‌زموونا هه‌رێما كوردستانێ ئێك بگرن و جاره‌كا دى كوردستانه‌كا بهێز دروست بكه‌ن ب تایبه‌ت ژ ئالیێ هه‌بوونا گوتاره‌كا سیاسى یا ئێكگرتى و دروستكرنا ئابووره‌كێ بهێز بۆ روونشتڤانێن هه‌رێمێ.
