ب ئاسته‌كێ لاواز زێره‌ڤانى ژ كه‌لار ڤه‌گه‌ریا
ئه‌ڤرۆ، زنار زوبێر:
د یاریه‌كا پاشخستى دا ژ گه‌را چارێ یا خولا هه‌رێما كوردستانێ یا ته‌پا پێ یانا زێره‌ڤانى ب ئاسته‌كێ لاواز یاریا خوه هه‌مبه‌ر یانا شێروانه ب وه‌كهه‌ڤى ب دوماهى ئینا بێ گۆل د وێ یاریێ دا ئه‌وا ئه‌ڤرۆ ل یاریگه‌ها شێروانه هاتیه كرن.
د نیڤا ئێكێ دا هه‌ردو تیم ب ئارمانجا سه‌ركه‌فتنێ هاتنه د یاریێ دا و ئه‌و ئاستێ چاڤه‌رێ كرى ژ هه‌ردو تیمان نه هاته دیتن تایبه‌ت یاریكه‌رێن زێره‌ڤانى ئه‌وێن ب ئاسته‌كێ لاواز پێشكێش كرى ژ ئه‌گه‌رێ خرابیا ئه‌ردێ یاریگه‌هێ به‌رامبه‌ر یاریكه‌رێن شێروانه زێده‌تر شیان خوه نێزیكى گۆلا زێره‌ڤانى بكه‌ن و چه‌ندین ده‌لیڤه‌یان په‌یدابكه‌ن لێ هێلا به‌ره‌ڤانیا زێره‌ڤانى رێگربوو د هه‌ولێن تیما خودانا یاریگه‌هێ هه‌تا نیڤا ب دوماهى هاتى بێ گۆل.
د نیڤا دویێ دا هه‌ردو تیم ب ئاسته‌كێ باشتر هاتنه د یاریێ دا و راهێنه‌رێ زێره‌ڤانى چه‌ند گۆهۆرین كرن و پلانا یاریێ هاته گوهارتن و شیان نیڤا یاریگه‌هێ كونترول بكه‌ن لێ نه‌شیان چو هێرشێن مه‌ترسیدار لسه‌ر گۆلا شێروانه په‌یدابكه‌ن به‌رامبه‌ر یاریزانێن شێروانه شیان چه‌ندین ماوه‌یان دا فشاره‌كا زێده‌تر لسه‌ر گۆلا تیما مێڤان په‌یدابكه‌ن لێ هه‌مى هێرشێن وان بێ دوماهى بون هه‌تا 20 ده‌قیقه‌یێن دوماهیێ یاریكه‌رێن زێره‌ڤانى شیان چه‌ند ده‌لیڤه‌یێن كیم لسه‌ر گۆلا شێروانه په‌یدابكه‌ن لێ ژبه‌ر نه‌بونا هێرشبه‌رێ گۆلكه‌ر مفا ژ ڤان ده‌لیڤه‌یان نه هاته دیتن و یارى ب دوماهى هات ب وه‌كهه‌ڤى بێ گۆل.
ب ڤى ئه‌نجامى هژمارا خالێن زێره‌ڤانى بونه پێنج خال ل رێزا شه‌شێ و یانا شێروانه دو خال ل رێزا دوماهیێ.
