ب وێنه و ڤیدیۆ: چاوانیا چێکرنا مالكێن برنجی
ئەڤرۆ نیوز، نەوزاد ھلۆری:
وەلاتیێن سنوورێ ناحیا دێرەلوک ب شێوەیەکێ کوم کوم و زوبارە بەرێ خوە دایە چاندنا برنجی ب تایبەتی ل چەمێ گوندێ ھاریکار ، بەلێ ھاتنا ھەیڤا رەمەزانێ بویە سەدەم کو کارتێکرن ل چاندنا برنجی بکەت و پشکەک ژ جوتیاران ب شەڤ برنجی دچینن.
نژیار ھاریکی کو ئێکە ژ جوتیارێن گوندێ ھاریکا بۆ ئەڤرۆ نیوز گۆت: (ئەڤرۆ ب شێوەیێ زوبارە ئەم ھاتینە چاندنا برنجی و دەست ب درۆستکرنا دورینە و ھەری و شێلا برنجی کریە و نێزیکێ سێ زەڤیان مە ب چاندنا برنجی کریە).
روستەم عەبدوللا جوتیارەکێ دی یێ دەڤەرێ یە دایە دیارکر کو بارانێن بەردەوام و ھاتنا رەمەزانێ بویە ئەگەر کو ھێشتا 75% ژ برنجێ دێرەلوک و ھاریکار نەھێتە چاندن و بۆ ئەڤرۆ نیوز گۆت: (یا پێدڤی بوو ھەتا نھا خەلکی برنجێ خوە چاندبایە ، و نھا کو ھەیڤا رەمەزانێ یە خەلک نکاریت برنجی بچین و ئەگەر بھێن بو چاندنا برنجی دڤێت بتنێ دانێ سپێدێ بھێنە برنجی و ھندەک ژ وەلاتیان ژی نەچارن کو ب شەڤ برنجی بچینن چونکی پارسال ڤی دەمی برنج ھاتبویە چاندن).
برنجێ کوردی ب تام و رەنگ و بێھن و ساخلەمیا خوە بناڤ و دەنگە و وەلاتی ژ بلی فروتنێ دھەمان دەم دا ب خوارنا خوە ژی برنجی دچینن و دڤی واریدا جەلال حەسەن کو ئێکە ژ جوتیارێن دێرەلوک بۆ ئەڤرۆ نیوز گۆت: (ل دێرەلوک و چەمێ ھاریکار سێ جورێن برنجی دھێنە چاندن مینا روتێ کورت و روتێ درێژ و کەسنەدیتی، برنجێ کوسنەدیتی تامێ خوشە و لێنانا وێ ب ساناھی یە ، بەلێ بەرھەمێ وی کێمە ، برنجێ رووتێ کورت تاما وێ خوشە و بەرھەمێ وێ زورە، بەلێ روتێ درێژ تاما وی گەلەک خوش نینە بەلێ بەرھەمێ وی زورە و نھا 80% ژ خەلکی برنجێ رووتێ درێژ دچینن ، و بھایێ روتێ کورت تەنەکە ب 18 ھزار دینارایە و روتی َدرێژ ب 15 ھزار دینارا و کەسنەدیتی ژی ب 23 ھزار دینارایە کو باشترین برنجێ کوردی یە و ژ جورێ شەش مەھیی یە نەک سێ مەھی).