سەرۆکێ فراکسیۆنا پارتی خانیێ پەرلەمانی رادەست دکەت
ئەڤرۆ نیۆز، رێوار مزیری:
سەرۆکێ فراکسیۆنا پارتی دیموکراتی کوردستان ل پەرلەمانی کوردستانێ بۆ ئەڤرۆ نیۆز دیار کر کو پشتی وی بۆ دەمێ چار سالان خانوو یێ خوە یێ پەرلەمانتاریێ بێ بەرامبەر پێشکێشی رێکخراوەکا ئۆتیزمێ کری ل رۆژا 22-7-2018ێ گرێبەستا وی دگەل وێ رێکخراوێ ب دووماھی ھات و گۆت: “ل دو رۆژێن داھاتی دێ خانی رادەستی ئیدارا پەرلەمانی کەم”.
ئۆمێد خۆشناو، سەرۆکێ فراکسیۆنا پارتی دیموکراتی کوردستان ل پەرلەمانی کوردستانێ ئاشکرا کر کو پشتی دەرچوونا وی د ھەلبژارتنێن بۆری یێن پەرلەمانێ کوردستانێ دا و بوویە پەرلەمانتار، بڕیار دابوو خانیێ پەرلەمانتاریێ رەت بکەت یان ژی ھەکە وەرگرت بێ بەرامبەر پێشکێشی رێکخراوەکا خێرخوازی بکەت، ژ بەر ڤێ چەندێ پشتی خانی وەرگرتی ل رۆژا 19-8-2014ێ بێ بەرامبەر پێشکێشی رێکخراوا ھوما یا ئۆتیزمێ کر داکو خزمەتا زارۆیێن ئۆتیزمێ بھێتەکرن و وی و خێزانا خوە بڕیار دا ھەر ل وی تاخێ مللی بژین یێ کو ئەو لێ مەزن بووی.
ناڤھاتی ئاماژە دا وێ چەندێ کو ژ بەر تەمام بوونا گرێبەستێ ل گەل رێکخراوا ناڤھاتی و نێزیکبوونا تەمامبوونا خۆلا پەرلەمانی وی ل رۆژا رۆژا 22-7-2018ێ خانی ژ وێ رێکخراوێ وەرگرت و ل دو رۆژێن داھاتی دێ رادەستی ئیدارا پەرلەمانی کەت.