ھەر دەمێ ئاسایشا نشتیمانی پێدڤی بیت تۆڕێن جڤاکی دێ ھێنەگرتن
ئه‌ڤرۆ نيوز:
پێشبینی دھێتەکرن ل گەل بەردەوامیا خوەنیشادانێن عیراقێ جارەکا دی ھێلێن ئنترنێت و تۆڕێن جڤاکی بھێنە گرتن، بەرپرسەکێ وەزارەتا گەھاندنا ھەرێما کوردستانێ ژی دبێژیت: ئاسایشا نشتیمانی و بەرژەوەندیێن گشتی ل بەرچاڤ ھاتینە وەرگرتن و ئەگەر ھەیە بھێنە گرتن.
ئومێد محەمەد، پەیڤدارێ وەزارەتا گەھاندنێ بۆ رۆژناما ئەڤرۆ گۆت: “گرتنا تۆڕێن جڤاکی زیانێن زۆر گەھاندینە وەلاتی و کۆمپانیان، بەلێ د دەمێ نوکە دا بڕیار ھاتیە دان بھێنە ڤەکرن، ل گەل بەردەوامیا خوەنیشادانان ئەگەر ھەیە جارەکا دی بھێنەگرتن، چونکو ل ھەر جھەکێ ئالۆزی پەیدابن دێ کاریگەری ل سەر گرتنا تۆڕێن جڤاکی ھەبیت، چونکو ھەر بابەتەکێ زیان بۆ ئاسایشا نشتیمانی و بەڕژەوەندیێن گشتی ھەبن ھەموو تشتەکێ دی بەتال دبیت و بەڕژەوەندیا گشتی بەرچاڤ دھێتە وەرگرتن”.
ژ ئەگەرێ گرتنا تۆڕێن جڤاکی و ھێلا ئنترنێتێ ئەو ژی ژ ئەگەرێ ئالۆزیا رەوشا عیراقێ زیانێن مەزن یێن ماددی بۆ کۆمپانیێن ئنترنێتێ و بازرگانی گەھاندینە، ئومێد محەمەد گۆت: “چو کەس و لایەنەک ل دۆر گرتنا سۆشیال میدیایێ میدیایێ ناھێتە قەرەبووکرن، چونکو بڕیارا وەزارەتێ دەرکەفتبوو بھێنە گرتن، راستە کۆمپانیێن بیاڤێ گەھاندنێ گازندە ھەبوون و زیان ژی بۆ ئەڤان کۆمپانیا ھەبووینە، بەلێ د دەمێ نوکە دا چو بڕیار نینە چو کۆمپانیەک بھێتە قەرەبووکرن یێن ژ ئەگەرێ راگرتنا تۆڕێن جڤاکی زیان ڤێکەفتبن”.