راهێنه‌رێ ریال مه‌درید ئەڤ شەڤە د تاقیکرنەکا ب ھێز دا
ئەڤرۆ نیوز:
بریارە ئەڤ شەڤە ل دەمژمێر ١٠:٠٠ شەڤ ل دیف دەمێ ھەرێما کوردستانێ یاریا سوپەرا ئوروپی ناڤبەرا ھەردو جەمسەرێن باژێرێ مەدرید یێ ئسپانی ریال مەدرید و ئەتلەتیکو مەدرید بھێتە کرن ل یاریگەھا لوک ئەرینا ل باژێرێ تالین یا پایتەختێ وەلاتێ ئەستونیا.
رۆژنامەیێن ئسپانی زێدەتر گرنگیەکا مەزن دایە ڤێ یاریێ تایبەت راھێنەرێ ریال مەدرید جولیان لوپێتیگی ئەوێ دێ بۆ جارا ئێکێ د ژیانا خوە دا یاریا سوپەرا ئوروپی وەک یاریزان و راھێنەر ھەمبەر راھێنەرێ ئەتلەتیکو مەدرید دیێگو سیمیونی کەت.
رۆژناما مارکا ئاماژە ب ڤێ چەندێ دایە و دیارکریە راھێنەرێ ئەتلەتیکو مەدرید شارەزایەکا باش د یاریێن دێربی دا ھەیە ژ سەرجەمێ ٢٦ یاریێن بوری شیایە سەرکەفتنێ ل سەر چار راھێنەرێن ریال مەدرید توماربکەت و ئەڤ چەندە ژی دێ بیتە پشتەڤان بۆ ڤی راھێنەرێ تایبەت پشتی ل ڤی وەرزی شیاین چەندین ھەڤبەستێن گران بھا دگەل توماس لیمار و دیسان جیلسون مارتینێز زێدەباری بەرەڤانێ کولومبی سەنتیاگو ئەریاس بیتە رێزێن خوە و ھێزەکا دی جودا ژ وەرزێ بوری ل پێکھاتێ تیما خوە زێدەبکەت.
ژلایێ خوە ڤە راھێنەرێ ریال مەدرید لوپێتیگی دیارکریە تیما وی یا بەرھەڤە بۆ یاریا ئەڤ شەڤە پشتی تیما وی کەمپا راھێنانێن خوە ل وەلاتێ ئەمریکا ب سەرکەفتیانە ب دوماھی ئینای بێ ھنگافتن زێدەباری ئەنجام دانا چەند یاریێن ھەڤالینی کو نێزیکبونەکا باش ناڤ یاریزانان دا پەیدابویە و یاریزانێن وی ئەسینسیو و یێ بەرازیلی ڤینیسیوس شیاینە د ماوێ خوە ئامادەکرنێ دا باشتری ئاست پێشکێش بکەن و دگەل ستێرا یانێ گاریس بێل دێ شێن ھێزەکا زێدە ل ھێرشبەریێ کەن و قەرەبویا چونا رونالدی کەن لەورا یێ گەشبینە د تاقیکرنا خوە یا ئێکێ دا دێ ب سەرکەفتیانە ب دوماھی ئینن سەرەرای کو ئەتلەتیکو ژ تیمێن ب ھێزە و یا ب زەحمەتە بشێن ب ساناھی سەرکەفتنێ تومارکەین.
