هه‌رێما کوردستانێ ژ دو جۆرێن دیتر یێن ده‌رمانێ سەخته دهێته ئاگەهدارکرن
ئەڤرۆ نیوز ، زنار تۆڤی:
وه‌زاره‌تا ساخلەمیا عیراقێ ئاگەهداریا ددەتە ساخلەمیا هه‌رێمێ، كو رێگریێ بكەت ل دو جۆرێن ده‌رمانێن سەخته.
وه‌زاره‌تا ساخلەمیا عیراقێ ب دو نڤیسارێن فەرمی ب هژمارێن (٢٩٩٧٢) و (٤٦٠٤٤)، ئاگەهداریا وه‌زاره‌تا ساخلەمیا هه‌رێمێ دکەت، کو هه‌ردو ده‌رمانێن (Daonil (Glibenclamide 5mg Tab.) و (Norditropin (SimpliXx) ب هژمارا باچێن (3KT9A) و (KX95408)، كو ژلایێ كۆمپانیێن (Sanofi) و (Novo nordisk) به‌رهه‌مهاتینە، دسەخته‌نە و هیچ كاریگه‌ری ل سه‌ر نه‌خۆشی نینە و نابیت بهێنە ب کارئینان.
هەروەسا رێڤه‌به‌ریا كۆنترۆلا ده‌رمانی ل وه‌زاره‌تا ساخلەمیا هه‌رێمێ د راگه‌هاندنەکێدا، ئاماژه ب هندێ کریە، کو پشتی هاتینە ئاگەهداركرن ژ لایێ وه‌زاره‌تا ساخلەمیا عیراقێ لیژنا چاڤدێریا بازاری دووڤچوون ل سه‌ر هه‌ردو جۆرێن ده‌رمانی كرینە و دێ ب سەر وان هه‌موو دەرمانان دا گریت.
دیسا كۆنترۆلا جۆرێ ده‌رمان داخوازێ ژ وەلاتیان و ده‌رمانخان و ستافێ ساخلەمیێ دکەت، کو هه‌ردو جۆرێن ده‌رمانان ب كارنه‌ئینن و ل دەمێ دیتنا وان ده‌رمانان، وه‌زاره‌تا ساخلەمیێ ئاگەهدار بكه‌ن.
