بازرگانیا ھەرێمێ پلان ھەیە ب خوە ئاھێن خوارنێ یێن ھەیڤانە ب کڕیت
ئه‌ڤرۆ نيوز:
بەرپرسەکێ وەزارەتا بازرگانیا ھەرێما کوردستانێ ئاشکرا کر کو بازرگانیا ھەرێما کوردستانێ پێشنیارکریە پارێزگەھێن ھەرێما کوردستانێ ب خوە ئاھێن خوارنێ یێن ھەیڤانە بکرن و ل سەر وەلاتیان بەلاڤ کەن، لێ بازرگانیا عیراقێ ب ڤێ چەندێ یا رازی نینە.
نەوزاد ئەدھەم، رێڤەبەرێ گشتیێ بازرگانی ل حوکمەتا ھەرێما کوردستانێ بۆ رۆژناما ئەڤرۆ دیار کر کو ژ بەر گازندێن خەلکێ ل دۆر خرابی و بێسەروبەریا پشکا خوارنا ھەیڤانە وان پلانەک ھەیە بۆ وێ چەندێ ھەر پارێزگەھەک ب خوە پشکا ئاھێن خوارنێ یێن ھەیڤانە بکڕیت و ل سەر ئاکنجیێن سنوورێ خوە بەلاڤ بکەت، ژ بەر کو دێ کوالێتیا وان ئاھێن خوارنێ باشتربیت و زۆر ئاریشە دێ کێمتربن، بەلێ وان بناڤێ پارێزگەھێن ھەرێما کوردستانێ ئەڤ پێشنیارە دایە بازرگانیا بەغدا، مخابن حوکمەتا عیراقێ رازینەبوو ئەو ب خوە وەک ھەرێما کوردستانێ سەرەدەریێ دگەل ئاھێن خوارنێ بکەن.
ناڤھاتی ئاماژە دا وێ چەندێ کو یا خویایە ئەڤ ئاھێن خوارنێ یێن ھەیڤانە ل سەر وەلاتیان دھێنە بەلاڤکرن گەلەک جاران ب کێر خوارنێ ناھێن و وەلاتی بکار نائینن، لەوڕا دەستھەلات ددەستێ ھەر پارێزگەھەکێ دابیت وی دەمی وەلاتی رازی نابن ئاھێن خوارنێ یێن خراب بھێتە بەلاڤکرن و گۆت: ”ھەکە بھێت و پلانا مە بۆ سالێن بھێت سەر بگریت و بازرگانیا بەغدا رازی بیت ھەرێما کوردستانێ یا بەرھەڤە کار بۆ بکەت”.
