سیاسەتمەدارەکێ باکورێ کوردستانێ: ریفراندۆم بریارەکا دیموکراتیک و سەردەمیانە یا گەلێ کوردستانێ بوو
ئه‌ڤرۆ نيوز:
سیاسەتمەدارەکێ باکورێ کوردستانێ دیار دکەت کو سەرۆک بارزانی شیا ھەموو پارت و ئالیێن سیاسی یێن ھەرێما کوردستانێ ل دۆر ریفراندۆمێ بکەتە خوەدان ئێک ھەلویست و بریارا ریفراندۆمێ وەسا ھاتە دان و ریفراندۆم بریارەکا سەردەمیانە یا گەلێ کوردستانێ بۆ بدەستڤەئینانا مافێن خوە یێن رەوا بوو، لێ مخابن خیانەتا ناڤخوەیی نەھێلا کورد بگەھنە ئارمانجا خوە.
ئیبراھیم گوچلو سیاسەتمەدارێ ناڤدار یێ باکورێ کوردستانێ د دیدارەکا تایبەت دا ل گەل رۆژناما ئەڤرۆ دیار کر کو سالەک ل سەر ریفراندۆما ھەرێما کوردستانێ دەرباز بوو، دوژمنێن گەلێ کوردستانێ چو دەمەکێ رازی نەبووینە کورد ژی وەکو گەلێن دی ل دەڤەرێ ل سەر ئاخا خوە ب ئازادی بژین، ژ بەر ھندێ ژی ل ھەرێما کوردستانێ ب پێشەنگیا سەرۆک بارزانی کوردان بریارا خوە دان کو ریفراندۆمەکێ بکەن و سالا بۆری ل ٢٥ ئیلۆنێ ئەڤ پێنگاڤە ھاتە ھاڤێتن و گۆت: (من دڤێت ڤێ بێژم کو رۆلێ سەرۆک بارزانی و پارتی دیموکراتی کوردستان د ریفراندۆمێ دا سەرەکی بوو، لێ بریارا ریفراندۆمێ بریارا ھەموو نەتەوا کورد ل ھەرێما کوردستانێ بوو، ژ بەر ھندێ ژی بریارەکا دیموکراتیک و سەردەمیانە بۆ بدەستڤەئینانا مافێ رەوا یێ گەلێ کوردستانێ بوو و دڤێت کورد ھەموو دەمەکێ شانازیێ ب ریفراندۆمێ و ئەنجامێ وێ بکەن کو ٩٣% ژ خەلکێ کوردستانێ پشتەڤانی ل ئاڤاکرنا دەولەتا کوردی کرن).
ناڤھاتی ئەو یەک ژی دیار کر کو مخابن ھەلویستێ ئەمریکا و وەلاتێن رۆژئاڤا ل ھەمبەر ئیرادا گەلێ کوردستانێ باش نەبوو و خیانەتا ناڤخوەیی یا کو ل کەرکووکێ ھاتە کرن ژی رێ بۆ دوژمنێن کوردستانێ ڤەکر کو ھێرشی کەرکووکێ و دەڤەرێن دی بکەن و گۆت: (لێ دڤێت ھەموو کەسەک ڤێ یەکێ باش بزانیت کو بریارا ریفراندۆما و ئەنجامێ کو بدەستڤە ھات ھەر دەم زندی یە و کورد شانازیێ پێ دکەن).
ئیبراھیم گوچلو د بەردەوامیا ئاخڤتنا خوە دا ئەو یەک ژی دیار کر کو کوردان دخواستن دەولەتەکا دیموکراتیک و سەردەمیا ب رێیا ریفراندۆمێ ئاڤا بکەن لێ مخابن دەولەتێن داگیرکەرێن رۆژھەلاتا ناڤین و خیانەتا ناڤخوە ئاستەنگی دروست کرن، لێ سەرۆک بارزانی ھەردەم دبێژیت ئەم چو دەمەکێ دەستان ژ ئاڤاکرنا دەولەتا کوردستانێ بەرنادەین و ئەز ب باوەرم دێ رۆژەک ھەر ھێت کو کار ب ئەنجامێ ریفراندۆمێ بھێتە کرن و گۆت: (کوردێن ھەر چار پارچێن کوردستانێ پشتەڤانی ل ریفراندۆمێ کرن و ژ بەر ھندێ ژی ئەڤرۆکە سەرەرای ئالۆزیێن کو دروست بوون کوردێن ھەموو جیھانێ شانازیێ ب رۆژا ٢٥ ئیلۆنێ و ریفراندۆمێ دکەن و کوردان بۆ ھەموو جیھانێ سەلماند کو وان ژی دڤێت وەکو ھەموو گەلێن دی یێن جیھانێ ب رەنگەکێ ئازاد بژین، کوردان بۆ ھەموو جیھانێ سەلماند ئەو دخوازن ل سەر ئاخا خوە ل گەل ھەموو نەتەوە و کێم نەتەوە و بیروباوەرێن جودا وەکو برا پێکڤە بژین).
سیاسەتمەدارێ ناڤدارێ باکورێ کوردستانێ ئەو یەک ژی دیار کر کو د ھەلبژارتنێ بۆری یێن عیراقێ دا پارتی دیموکراتی کوردستان وەکو پارتی ل سەر ئاستێ عیراقێ یەکەم بوو، ئەو یەک ژی نیشا دا کو گەلێ کوردستانێ ل سەر رێیا ریفراندۆمێ و مافێ سەرخوەبوونێ بەردەوامە و ژ بەر ھندێ ژی پشتەڤانی ل پارتی و سەرۆک بارزانی کرن.
ئیبراھیم گوچکو ئەو یەک ژی دیار کر کو چەند رۆژێن دی ل ھەرێما کوردستانێ دێ ھەلبژارتن ھێنە کرن، ئەز ھێڤیدارم کو دیسان گەلێ مە دەنگێ خوە بدەنە پارتی دیموکراتی کوردستان، چونکو تنێ ھێزە شەری بۆ مافێن نەتەوی یێن گەلێ کوردستانێ دکەت و ھەتا نھا گەلەک قوربانی بۆ ڤێ ئارمانجا پیرۆز داینە، دەمێ داعشێ و حەشدا شەعبی ھێرشی کوردستانێ کری پارتی دیموکراتی کوردستان و سەرۆک بارزانی ل سەنگەرێ پێشیێ بوون و شەر بۆ پاراستنا کوردستانێ کرن و گۆت: (ژ بەر ھندێ ژی ئەز ھێڤیدارم د ڤان ھەلبژارتنان دا جارەکا خووشک و برایێن مە ل ھەرێما کوردستانێ دەنگێ خوە بدەنە پارتی، چونکو پارتی ب خەباتا خوە گەرەنتیا پاشەرۆژا ھەموو کوردان دکەت، پارتی کار بۆ ئارمانجا مە یا پیرۆز دکەت کو ئەو ژی ئاڤاکرنا دەولەتا کوردستانێ یە).
سیاسەتمەدارێ باکورێ کوردستانێ د دووماھیا ئاخڤتنا خوە دا ئاماژی ب ڤێ یەکێ کر کو دوژمنێن مە ژی باش دزانن کورد دێ ھەر رۆژەکێ دەولەتا خوە ئاڤا کەن، ژ بەر ھندێ ژی نھا پتر ژ ھەر دەمەکێ ھێرشی کوردان ل ھەر چار پارچێن کوردستانێ دکەن، لێ بریارا ریفراندۆمێ و ھەلویستێ سەرۆک بارزانی بۆ ھەموو ئالیەکێ دوپات کر کو کورد چو دەمەکێ دەستان ژ ئارمانجا خوە یا پیرۆز بەرنادەن و دێ ھەر رۆژەکێ گەھنە ئارمانجا خوە و دێ دەولەتا کوردی ھێتە راگەھاندن.
